Atharva Veda · Chapter 20.126

20.126
vi hi sotorasṛkṣata nendraṃ devamamaṃsata /
yatrāmadadvṛṣākapiraryaḥ puṣṭeṣu matsakhā viśvasmādindra uttaraḥ

parā hīndra dhāvasi vṛṣākaperati vyathiḥ /
no aha pra vindasyanyatra somapītaye viśvasmādindra uttaraḥ

kimayaṃ tvāṃ vṛṣākapiścakāra harito mṛgaḥ /
yasmā irasyasīdu nvaryo vā puṣṭimadvasu viśvasmādindra uttaraḥ

yamimaṃ tvaṃ vṛṣākapiṃ priyamindrābhirakṣasi /
śvā nvasya jambhiṣadapi karṇe varāhayurviśvasmādindra uttaraḥ

priyā taṣṭāni me kapirvyaktā vyadūduṣat/
śiro nvasya rāviṣaṃ na sugaṃ duṣkṛte bhuvaṃ viśvasmādindra uttaraḥ

na matstrī subhasattarā na suyāśutarā bhuvat/
na matpraticyavīyasī na sakthyudyamīyasī viśvasmādindra uttaraḥ

uve amba sulābhike yathevāṅgaṃ bhaviṣyati /
bhasan me amba sakthi me śiro me vīva hṛṣyati viśvasmādindra uttaraḥ

kiṃ subāho svaṅgure pṛthuṣṭo pṛthujāghane /
kiṃ śūrapatni nastvamabhyamīṣi vṛṣākapiṃ viśvasmādindra uttaraḥ

avīrāmiva māmayaṃ śarārurabhi manyate /
utāhamasmi vīriṇīndrapatnī marutsakhā viśvasmādindra uttaraḥ

saṃhotraṃ sma purā nārī samanaṃ vāva gacchati /
vedhā ṛtasya vīriṇīndrapatnī mahīyate viśvasmādindra uttaraḥ

indrāṇīmāsu nāriṣu subhagāmahamaśravam /
nahyasyā aparaṃ cana jarasā marate patirviśvasmādindra uttaraḥ

nāhamindrāṇi rāraṇa sakhyurvṛṣākaperṛte /
yasyedamapyaṃ haviḥ priyaṃ deveṣu gacchati viśvasmādindra uttaraḥ

vṛṣākapāyi revati suputra ādu susnuṣe /
ghasatta indra ukṣaṇaḥ priyaṃ kācitkaraṃ havirviśvasmādindra uttaraḥ

ukṣṇo hi me pañcadaśa sākaṃ pacanti viṃsatim /
utāhamadmi pīva idubhā kukṣī pṛṇanti me viśvasmādindra uttaraḥ

vṛṣabho na tigmaśṛṅgo'ntaryūtheṣu roruvat/
manthasta indra śaṃ hṛde yaṃ te sunoti bhāvayurviśvasmādindra uttaraḥ

na seśe yasya rambate'ntarā sakthyā kapṛt/
sedīśe yasya romaśaṃ niṣeduṣo vijṛmbhate viśvasmādindra uttaraḥ

na seśe yasya romaśaṃ niṣeduṣo vijṛmbhate /
sedīśe yasya rambate'ntarā sakthyā kapṛtviśvasmādindra uttaraḥ

ayamindra vṛṣākapiḥ parasvantaṃ hataṃ vidat/
asiṃ sūnāṃ navaṃ carumādedhasyāna ācitaṃ viśvasmādindra uttaraḥ

ayamemi vicākaśadvicinvan dāsamāryam /
pibāmi pākasutvano'bhi dhīramacākaśaṃ viśvasmādindra uttaraḥ

dhanva ca yatkṛntatraṃ ca kati svittā vi yojanā /
nedīyaso vṛṣākape'stamehi gṛhāmupa viśvasmādindra uttaraḥ

punarehi vṛṣākape suvitā kalpayāvahai /
ya eṣa svapnanaṃśano'stameṣi pathā punarviśvasmādindra uttaraḥ

yadudañco vṛṣākape gṛhamindrājagantana /
kva sya pulvagho mṛgaḥ kamagaṃ janayopano viśvasmādindra uttaraḥ

parśurha nāma mānavī sākaṃ sasūva viṃśatim /
bhadraṃ bhala tyasyā abhūdyasyā udaramāmayadviśvasmādindra uttaraḥ