Atharva Veda · Chapter 18.1

o citsakhāyaṃ sakhyā vavṛtyāṃ tiraḥ purū cidarṇavaṃ jaganvān /
piturnapātamā dadhīta vedhā adhi kṣami prataraṃ dīdhyānaḥ

na te sakhā sakhyaṃ vaṣṭyetatsalakṣmā yadviṣurūpā bhavati /
mahasputrāso asurasya vīrā divo dhartāra urviyā pari khyan

uśanti ghā te amṛtāsa etadekasya cittyajasaṃ martyasya /
ni te mano manasi dhāyyasme janyuḥ patistanvamā viviṣyāḥ

na yatpurā cakṛmā kaddha nūnamṛtaṃ vadanto anṛtaṃ rapema /
gandharvo apsvapyā ca yoṣā sā nau nābhiḥ paramaṃ jāmi tan nau

garbhe nu nau janitā dampatī kardevastvaṣṭā savitā viśvarūpaḥ /
nakirasya pra minanti vratāni veda nāvasya pṛthivī uta dyauḥ

ko adya yuṅkte dhuri gā ṛtasya śimīvato bhāmino durhṛṇāyūn /
āsanniṣūn hṛtsvaso mayobhūn ya eṣāṃ bhṛtyāmṛṇadhatsa jīvāt

ko asya veda prathamasyāhnaḥ ka īṃ dadarśa ka iha pra vocat/
bṛhan mitrasya varuṇasya dhāma kadu brava āhano vīcyā nṝn

yamasya mā yamyaṃ kāma āgantsamāne yonau sahaśeyyāya /
jāyeva patye tanvaṃ riricyāṃ vi cidvṛheva rathyeva cakrā

na tiṣṭhanti na ni miṣantyete devānāṃ spaśa iha ye caranti /
anyena madāhano yāhi tūyaṃ tena vi vṛha rathyeva cakrā

rātrībhirasmā ahabhirdaśasyetsūryasya cakṣurmuhurun mimīyāt/
divā pṛthivyā mithunā sabandhū yamīryamasya vivṛhādajāmi

ā ghā tā gacchān uttarā yugāni yatra jāmayaḥ kṛṇavann ajāmi /
upa barbṛhi vṛṣabhāya bāhumanyamicchasva subhage patiṃ mat

kiṃ bhrātāsadyadanāthaṃ bhavāti kimu svasā yan nirṛtirnigachāt/
kāmamūtā bahvetadrapāmi tanvā me tanvaṃ saṃ pipṛgdhi

na te nāthaṃ yamyatrāhamasmi na te tanūṃ tanvā saṃ papṛcyām /
anyena matpramudaḥ kalpayasva na te bhrātā subhage vaṣṭyetat

na vā u te tanūṃ tanvā saṃ pipṛcyāṃ pāpamāhuryaḥ svasāraṃ nigacchāt/
asaṃyadetan manaso hṛdo me bhrātā svasuḥ śayane yacchayīya

bato batāsi yama naiva te mano hṛdayaṃ cāvidāmā /
anyā kila tvāṃ kakṣyeva yuktaṃ pari ṣvajātau libujeva vṛkṣam

anyamū ṣu yamyanya u tvāṃ pari ṣvajātau libujeva vṛkṣam /
tasya vā tvaṃ mana ichā sa vā tavādhā kṛṇuṣva saṃvidaṃ subhadrām

trīṇi cchandāṃsi kavayo vi yetire pururūpaṃ darśataṃ viśvacakṣaṇam /
āpo vātā oṣadhayastānyekasmin bhuvana ārpitāni

vṛṣā vṛṣṇe duduhe dohasā divaḥ payāṃsi yahvo aditeradābhyaḥ /
viśvaṃ sa veda varuṇo yathā dhiyā sa yajñiyo yajati yajñiyāmṛtūn

rapadgandharvīrapyā ca yoṣaṇā nadasya nāde pari pātu no manaḥ /
iṣṭasya madhye aditirni dhātu no bhrātā no jyeṣṭhaḥ prathamo vi vocati

so citnu bhadrā kṣumatī yaśasvatyuṣā uvāsa manave svarvatī /
yadīmuśantamuśatāmanu kratumagniṃ hotāraṃ vidathāya jījanan

adha tyaṃ drapsaṃ vibhvaṃ vicakṣanaṃ virābharadiṣiraḥ śyeno adhvare /
yadī viśo vṛṇate dasmamāryā agniṃ hotāramadha dhīrajāyata

sadāsi raṇvo yavaseva puṣyate hotrābhiragne manuṣaḥ svadhvaraḥ /
viprasya vā yacchaśamāna ukthyo vājaṃ sasavāmupayāsi bhūribhiḥ

udīraya pitarā jāra ā bhagamiyakṣati haryato hṛtta iṣyati /
vivakti vahniḥ svapasyate makhastaviṣyate asuro vepate matī

yaste agne sumatiṃ marto akhyatsahasaḥ sūno ati sa pra śṛṇve /
iṣaṃ dadhāno vahamāno aśvairā sa dyumāmamavān bhūṣati dyūn

śrudhī no agne sadane sadhasthe yukṣvā rathamamṛtasya dravitnum /
ā no vaha rodasī devaputre mākirdevānāmapa bhūriha syāḥ

yadagna eṣā samitirbhavāti devī deveṣu yajatā yajatra /
ratnā ca yadvibhajāsi svadhāvo bhāgaṃ no atra vasumantaṃ vītāt

anvagniruṣasāmagramakhyadanvahāni prathamo jātavedāḥ /
anu sūrya uṣaso anu raśmīn dyāvāpṛthivī ā viveśa

pratyagniruṣasāmagramakhyatpratyahāni prathamo jātavedāḥ /
prati sūryasya purudhā ca raśmīn prati dyāvāpṛthivī ā tatāna

dyāvā ha kṣāmā prathame ṛtenābhiśrāve bhavataḥ satyavācā /
devo yan martān yajathāya kṛṇvantsīdaddhotā pratyaṅsvamasuṃ yan

devo devān paribhūrṛtena vahā no havyaṃ prathamaścikitvān /
dhūmaketuḥ samidhā bhāṛjīko mandro hotā nityo vācā yajīyān

arcāmi vāṃ vardhāyāpo ghṛtasnū dyāvābhūmī śṛṇutaṃ rodasī me /
ahā yaddevā asunītimāyan madhvā no atra pitarā śiśītām

svāvṛgdevasyāmṛtaṃ yadī gorato jātāso dhārayanta urvī /
viśve devā anu tatte yajurgurduhe yadenī divyaṃ ghṛtaṃ vāḥ

kiṃ svin no rājā jagṛhe kadasyāti vrataṃ cakṛmā ko vi veda /
mitrasciddhi ṣmā juhurāṇo devāṃ chloko na yātāmapi vājo asti

durmantvatrāmṛtasya nāma salakṣmā yadviṣurūpā bhavāti /
yamasya yo manavate sumantvagne tamṛṣva pāhyaprayucchan

yasmin devā vidathe mādayante vivasvataḥ sadane dhārayante /
sūrye jyotiradadhurmāsyaktūn pari dyotaniṃ carato ajasrā

yasmin devā manmani saṃcarantyapīcye na vayamasya vidma /
mitro no atrāditiranāgāntsavitā devo varuṇāya vocat

sakhāya ā śiṣāmahe brahmendrāya vajriṇe /
stuṣa ū ṣu nṛtamāya dhṛṣṇave

śavasā hyasi śruto vṛtrahatyena vṛtrahā /
maghairmaghono ati śūra dāśasi

stego na kṣāmatyeṣi pṛthivīṃ mahī no vātā iha vāntu bhūmau /
mitro no atra varuṇo yujamāno agnirvane na vyasṛṣṭa śokam

stuhi śrutaṃ gartasadaṃ janānāṃ rājānaṃ bhīmamupahatnumugram /
mṛḍā jaritre rudra stavāno anyamasmatte ni vapantu senyam

sarasvatīṃ devayanto havante sarasvatīmadhvare tāyamāne /
sarasvatīṃ sukṛto havante sarasvatī dāśuṣe vāryaṃ dāt

sarasvatīṃ pitaro havante dakṣiṇā yajñamabhinakṣamāṇāḥ /
āsadyāsmin barhiṣi mādayadhvamanamīvā iṣa ā dhehyasme

sarasvati yā sarathaṃ yayāthokthaiḥ svadhābhirdevi pitṛbhirmadantī /
sahasrārghamiḍo atra bhāgaṃ rāyaspoṣaṃ yajamānāya dhehi

udīratāmavara utparāsa un madhyamāḥ pitaraḥ somyāsaḥ /
asuṃ ya īyuravṛkā ṛtajñāste no'vantu pitaro haveṣu

āhaṃ pitṝntsuvidatrāmavitsi napātaṃ ca vikramaṇaṃ ca viṣṇoḥ /
barhiṣado ye svadhayā sutasya bhajanta pitvasta ihāgamiṣṭhāḥ

idaṃ pitṛbhyo namo astvadya ye pūrvāso ye aparāsa īyuḥ /
ye pārthive rajasyā niṣaktā ye vā nūnaṃ suvṛjanāsu dikṣu

mātalī kavyairyamo aṅgirobhirbṛhaspatirṛkvabhirvāvṛdhānaḥ /
yāṃśca devā vāvṛdhurye ca devāṃste no'vantu pitaro haveṣu

svāduṣkilāyaṃ madhumām̐ utāyaṃ tīvraḥ kilāyaṃ rasavām̐ utāyam /
uto nvasya papivāṃsamindraṃ na kaścana sahata āhaveṣu

pareyivāṃsaṃ pravato mahīriti bahubhyaḥ panthāmanupaspaśānam /
vaivasvataṃ saṃgamanaṃ janānāṃ yamaṃ rājānaṃ haviṣā saparyata

yamo no gātuṃ prathamo viveda naiṣā gavyūtirapabhartavā u /
yatrā naḥ pūrve pitaraḥ paretā enā jajñānāḥ pathyā anu svāḥ

barhiṣadaḥ pitara ūtyarvāgimā vo havyā cakṛmā juṣadhvam /
ta ā gatāvasā śaṃtamenādhā naḥ śaṃ yorarapo dadhāta

ācyā jānu dakṣiṇato niṣadyedaṃ no havirabhi gṛṇantu viśve /
mā hiṃsiṣṭa pitaraḥ kena cin no yadva āgaḥ puruṣatā karāma

tvaṣṭā duhitre vahatuṃ kṛṇoti tenedaṃ viśvaṃ bhuvanaṃ sameti /
yamasya mātā paryuhyamānā maho jāyā vivasvato nanāśa

prehi prehi pathibhiḥ pūryāṇairyenā te pūrve pitaraḥ paretāḥ /
ubhā rājānau svadhayā madantau yamaṃ paśyāsi varuṇaṃ ca devam

apeta vīta vi ca sarpatāto'smā etaṃ pitaro lokamakran /
ahobhiradbhiraktubhirvyaktaṃ yamo dadātyavasānamasmai

uśantastvedhīmahyuśantaḥ samidhīmahi /
uśann uśata ā vaha pitṝn haviṣe attave

dyumantastvedhīmahi dyumantaḥ samidhīmahi /
dyumān dyumata ā vaha pitṝn haviṣe attave

aṅgiraso naḥ pitaro navagvā atharvāṇo bhṛgavaḥ somyāsaḥ /
teṣāṃ vayaṃ sumatau yajñiyānāmapi bhadre saumanase syāma

aṅgirobhiryajñiyairā gahīha yama vairūpairiha mādayasva /
vivasvantaṃ huve yaḥ pitā te'smin barhiṣyā niṣadya

imaṃ yama prastaramā hi rohāṅgirobhiḥ pitṛbhiḥ saṃvidānaḥ /
ā tvā mantrāḥ kaviśastā vahantvenā rājan haviṣo mādayasva

ita eta udāruhan divaspṛṣṭhānvāruhan /
pra bhūrjayo yathā pathā dyāmaṅgiraso yayuḥ