Scripture Library

Anuvyakhyana · Chapter 4.4

4.4.1

|| śrīmadānandatīrthabhagavatpādācāryaviracite śrīmadbrahmasūtrānuvyākhyane caturthādhyāyasya tṛtīyaḥ pādaḥ ||
atikramoktiḥ kṛtirarthalābhaḥ parā gatiḥ pāragatistadokaḥ /
samastakāryaṃ vaśitā ca viśvasambhāvanā yuktayastvanyapakṣe

4.4.2

sāmānyarūpaṃ pratibhānamuktirāścaryatākṛtrimatāstadoṣaḥ /
viśeṣakḷptiḥ kṛtaniḥśramaśca māhātmyamityeva sunirṇayārthāḥ

4.4.3

ananyabhṛtyatvamihoditabhyastvanyasya bhṛtyatvanivāraṇāya /
patiṃ yadeṣāmapi viṣṇumāha hyutāmṛtatvasya patitvavāgdhareḥ

4.4.4

ete 'picānyādhipatitvayuktā viṣṇvanyacittvena yathā pumāṃsaḥ /
prasiddhibhājastviti cānumaiva hyabhīṣyasiddhayai bhavatīha niścayāt

4.4.5

muktasvakīyāvarayantṛtāsti muktāvapi brahmapurassarāṇām /
anena devena tathāmunā ca hīṣye parārvāktanalokināmiti

4.4.6

phalaṃ śrutirjñānata āha muktāvetacca sarvāśubhanāśaliṅgāt /
lokādhipatyaṃ ca vidhātureva sarvātmanetyāha turaśrutiśca /
sarve baliṃ devagaṇā vahantītyetacca nānyasya hi yuktimeti

4.4.7

lokā itīhāpi tu lokināṃ vaco lokā iti hyeva ravaḥ prajāsu /
prayujyate sarvajanaiḥ sadaiva tanmānino lokapadena coktāḥ /
tadgāstu muktā iha lokaśabdā anyonyanāthā iti paiṅgināṃ śrutiḥ

4.4.8

alokaśabdena vimuktibhājo vācyāḥ padaṃ tādṛgapīha yuktam /
lokābhidhāścāpi yato hi muktāḥ prakāśarūpāḥ satataṃ ca sarve /
brahmaiva lokādhipatirvimukto bhavediti prāha turaśrutiśca

4.4.9

naceha vijñānaphalaṃ samuktaṃ lokādhipatyaṃ ravibimbato harau /
uktaṃ pṛthak tacca puraiva yasmād bhedo 'munetyādi ca samyaguktaḥ

4.4.10

tvapratyayaṃ cāpyatihāya naiva rūpeṇa teneti bhavedihārthaḥ /
bhavatyasāvityaṇuśabdamatra vihāya vākyāni bahūni doṣaḥ

4.4.11

ato jagadvayāpṛtimanta eva brahmādayaḥ pūrṇaguṇāḥ krameṇa /
amandamānandamajasrameva bhuñjanta ātmīyamajāt samāsate

4.4.12

namo namo 'śeṣaviśeṣapūrṇaguṇaikadhāmne puruṣottamāya /
bhaktānukampādatiśuddhasaṃviddātre 'nupādhipriyasadguṇātmane

4.4.13

yasya trīṇyuditāni vedavacane rūpāṇi divyānalaṃ baṭ tad darśatamitthameva nihitaṃ devasya bhargo mahat /
vāyo rāmavaconayaṃ prathamakaṃ pṛkṣo dvitīyaṃ vapurmadhvo yattu tṛtīyametadanumā granthaḥ kṛtaḥ keśave

4.4.14

niḥśeṣadoṣarahitakalyāṇākhilasadguṇa /
bhūtisvayambhuśarvādivandyaṃ tvāṃ naumi me priyam

Original text: Anuvyākhyāna a Dvaita verse commentary on Bādarāyaṇa's Brahmasūtra · Data entry members of the Sansknet Project · GRETIL (Göttingen) · CC BY-NC-SA 4.0