Āṅgirasasmṛti · Chapter 2.10

daṇḍādūrdhvaṃ tu yatnena praharettu nipātayet /
dviguṇaṃ govrataṃ tasya prāyaścittaṃ vidhīyate //

aṅguṣṭhamātraṃ sthūlaḥ syād bāhumātrapramāṇataḥ /
sārdraśca sapalāśaśca daṇḍa ityabhidhīyate //

rodhane bandhane vāpi yojane vā gavāṃ rujā /
utpanne maraṇe vāpi nimittaṃ tatra vidyate //

pādamekaṃ caredrodhe dvau pādau bandhane caret /
yojanaṃ pādahīnaṃ syāc caretsarvaṃ nipātane //

na nārikelena na phālakena na mauñjinā nāpi ca valkalena /
etaiśca gāvo na hi bandhanīyā badhvā tu tiṣṭhetparaśuṃ pragṛhya //

kuśakāśaistu badhnīyād ūrdhvaṃ dakṣiṇatomukham /
pāśalagne tathā dāhe prāyaścittaṃ na vidyate //

yadi tatra bhavecchokaḥ prāyaścittaṃ kathaṃ bhavet /
japitvā pātamānīyaṃ mucyate sarvakilbiṣāt //

asthibhaṅgaṃ gavāṃ kṛtvā lāṅgūlacchedanaṃ tathā /
pātanaṃ caiva śṛṅgasya māsārdhaṃ yāvakaṃ pibet //

vraṇabhaṅge ca kartavyaḥ snehābhyaṅgaśca pāṇinā /
yavasaścopahartavyo yāvadrūḍhavraṇo bhavet //

asthibhaṅge tathā śṛṅga kaṭibhaṅge tathaiva ca /
yāvajjīvati ṣaṇmāsān prāyaścittaṃ na vidyate //

śruṅgabhaṅge 'sthibhaṅge ca carmanirmocane tathā /
daśarātraṃ pibedvajraṃ yāvatsvasti bhavettadā //

anyatrāṅkanalakṣmabhyāṃ vāhanirmocane tathā /
sāyaṃ saṃgopanārthaṃ tu na duṣyedrodhabandhayoḥ //

yantreṇa gocikitsārthaṃ mūḍhagarbhavimocane /
yatne kṛte vipadyeta na doṣastatra vidyate //

auṣadhaṃ snehamāhāraṃ dadyādgobrāhmaṇe hitam /
prāṇināṃ prāṇavṛttyarthaṃ prāyaścittaṃ na vidyate //

gaje vājini vā vyāghre khaḍge śyāmamṛge vṛke /
siṃhe śuni varāhe ca mayūre pakṣiṇāmapi //

kāke haṃse ca gṛdhre ca ṭiṭṭibhe khañjarīṭake /
yathā gavi tathā vindyād bhagavānmanurabravīt //

mohādvirūḍhamācārya pratyāvṛttau tu yo dvijaḥ /
prāyaścittaṃ na mṛgyeta śṛṇu tasyāpi yo vidhiḥ //

vihihataṃ yadakāmānāṃ kāmāttaddviguṇaṃ bhavet /
paścāttu dahyāttāpena kṛtvā pāpāni mānavaḥ //

dhanatyāgaṃ gṛhe kṛtvā sarvatyāgena śudhyati /
dravyairvā vipulairviprān toṣayedyaḥ suniścitam //

tannāryaḥ kāmataḥ prāptāḥ pāpamardhaṃ samādiśet /
arvāktu dvādaśādabdāt puruṣo hyardhabhāgbhavet //

aśītiryasya cāpūrṇā varṣārdhaṃ sakalo vidhiḥ /
prāyaścittasya ye klība bālavṛddhāṅganādayaḥ /
teṣu sarveṣu saṃcintya pādamekaṃ samācaret //