Ānandakanda · Chapter 1.8

Āk, 1, 8
<rasāyanasevā>
sūto vajraṃ suvarṇaṃ ca kāntalohaṃ tathābhrakam /
pañcaitānyamṛtāni syuḥ kalpitāni nṛṇāṃ mayā

mattakāśini yo vetti so'pi sākṣānmaheśvaraḥ /
ahaṃ raso rasaścāhamāvayorantaraṃ na hi

tena yuktāstu vajrādyāḥ siddhidāḥ syurna saṃśayaḥ /
puruṣaṃ rasasevārhaṃ vadāmi śṛṇu pārvati

strīklībabālakānāṃ ca na hi yojyaṃ rasāyanam /
bālāḥ pañcadaśābdā ye kumārāṃstriṃśadabdakāḥ

pañcāśadvarṣadeśīyā yuvānaḥ parikīrtitāḥ /
ataḥ paraṃ ca sthavirāḥ bhaveyuste rasāyane

yathoktakāle siddhiḥ syātkumārasya rasāyanāt /
tasmāddviguṇakālena yūnaḥ siddhirbhaveddhruvam

tasmāttriguṇakālena vṛddhaḥ siddhimavāpnuyāt /
jñātavyāḥ kramaśo devi hyuttamo madhyamo'dhamaḥ

<rasāyanasevākramaḥ>
pūrvam abhrakamaśnīyāttataḥ kāntarasāyanam /
atha kāntābhrakaṃ devi paścāddhemarasāyanam

athābhrakaṃ svarṇayogaṃ kāntahemarasāyanam /
ghanakāntasvarṇayogaṃ tato vajrarasāyanam

athābhravajrasevāṃ ca kāntavajramataḥ param /
ghanāyaskāntahīraṃ ca hemavajraṃ tato bhavet

paścādabhrasvarṇavajraṃ kāntāṣṭāpadavajrakam /
ghanakāntaṃ hemavajramataḥ pāradabhakṣaṇam

tathābhrarasayogaṃ syāttataḥ kāntarasaṃ bhavet /
ghanakāntarasaṃ devi paścāddhemarasaṃ bhavet

ghanahemarasaṃ paścātkāntahemarasaṃ tataḥ /
ghanakāntaṃ hemasūtamato vajrarasaṃ bhavet

ghanavajrarasaṃ devi kāntavajrarasaṃ tataḥ /
ghanakāntaṃ vajrasūtaṃ hemavajrarasaṃ tataḥ

ghanahemapavīsūtaṃ kāntahemapavīrasam /
ghanakāntasvarṇavajrarasam asmātparaṃ na hi

uttarottarataḥ sarve caite sarvaguṇottarāḥ /
rasāyanāni pañca syurekaikāni varānane

rasā dvidvyauṣadhabhavāstritryauṣadhabhavā daśa /
catuścaturbhavāḥ pañca tvekaḥ pañcauṣadhodbhavaḥ

ekatriṃśadvarārohe rasāyanamiti priye /
ghanaṃ kāntaṃ hema vajraṃ pāradaścetaram

pūrvottarottaraguṇā bhavanti prāṇavallabhe /
rasasya krāmaṇaṃ vajraṃ hemakāntaghanaṃ bhavet

vajrasaṃkrāmaṇaṃ hema kāntaṃ vyoma bhavetpriye /
hemnaḥ kāntabhavaṃ yojyaṃ kāntasya krāmaṇaṃ ghanam

abhrasya krāmaṇaṃ cābhrasattvaṃ siddhipradaṃ yataḥ /
ekaikauṣadhasevāyāṃ yathoktaṃ krāmaṇaṃ bhavet

yukto dvitricatuḥpañcabhaiṣajyaiḥ krāmaṇaṃ na hi /
triphalāmadhusarpīṃṣi sāmānyakrāmaṇaṃ bhavet