Ānandakanda · Chapter 1.16

Āk, 1, 16
<1. aṅkolakalpaḥ>
atha bravīmyahaṃ devi kalpamaṅkolabījakam /
caturbhiḥ sādhakair dhīrairviśuddhaiḥ śuddhikāṅkṣibhiḥ

samavetaḥ sādhakendraiḥ puṇyarkṣeṣvārabhecca tat /
aṅkolamūlaṃ vitṛṇaṃ kṛtvā saṃmārjya śodhanam

tatra liṅgaṃ ca saṃsthāpya tadagre sthāpayedghaṭam /
ekasūtreṇa badhnīyālliṅgāṅkolaghaṭān priye

gandhapuṣpādibhiḥ pūjāmaghoreṇa prakalpayet /
pratimāsaṃ divā naktaṃ puṣpādi phalitāvadhi

gṛhītvā tatphalaṃ pakvaṃ pūrayettadghaṭaṃ phalaiḥ /
yoginībhairavīprītyai mahāpūjāṃ vidhāya ca

ānīya tadghaṭaṃ gehe śoṣayedātape phalam /
vituṣāṇi ca bījāni kuryāt tanmukhagharṣaṇam

kuryāttato viśālāsye pātre mṛccūrṇalepanam /
ekaikaśaścordhvamukhaṃ ropayedbhujagākṛti

tatastu ṭaṅkaṇaṃ tadvat tattadvaktreṣu lepayet /
tatpātraṃ kāṃsyapātre ca sthāpayet tadadhomukham

ātape dhārayeddhīmānpalalaiśca tirodadhet /
dine dine cyutaṃ tailaṃ gṛhṇīyāddinapañcakam

tattailaṃ kācakūpyantaḥ sthāpayecca samantrakam /
ardhamātrāṅkolatailaṃ dviguṇaṃ tilatailakam

nāsārandhradvaye nasyaṃ jarāmṛtyuvināśanam /
sa jīvettriśataṃ varṣaṃ sarvāmayavivarjitaḥ

rogādijalapāśādyair bhramādyaiśca viṣeṇa ca /
gatāsūnāṃ nṛṇāṃ nasyaṃ kuryātpuṃśuklamiśritam

mṛtasūtaṃ ca tailaṃ te jīvanti ca na saṃśayaḥ /
mṛtasaṃjīvanī vidyā pūrvoktā kathitānaghe

<anye rasāyanakalpāḥ>
elābhayā vacā kākatuṇḍīphalamaruṣkaraḥ /
sahadevī nimbapatraṃ lāṅgalīkandameva ca

samāṃśaṃ śoṣayedyantre pātāle tailamāharet /
tattailaṃ nasyamādadyātsaptāhāntaritaṃ priye

evaṃ varṣe kṛte nasye sahasrāyurbhavennaraḥ /
nīlikāmūlasaṃyuktaṃ tailaṃ cārdhapalaṃ pibet

vatsarājjāyate siddho valīpalitavarjitaḥ /
jīvedbrahmadinaṃ tryabdādvāyuvego mahābalaḥ

bhṛṅgīrasaṃ kṛṣṇajīraṃ prasthaṃ prasthaṃ prakalpayet /
nīlotpalaṃ ca madhukaṃ prasthārdhaṃ ca pṛthagbhavet

tilatailaṃ pañcapalaṃ pācayetsarvamekataḥ /
tailāvaśiṣṭaṃ tattailaṃ jarā mṛtyuśca naśyati

ardhaniṣkaṃ caikaniṣkaṃ sārdhaniṣkaṃ krameṇa ca /
tailapramāṇamityuktam abdāñjīvecchatatrayam

iṣṭikākṣipalaṃ kṣiptvā karṣaikamudakaiḥ pibet /
vatsarātpalitaṃ hanti sahasrāyurbhavennaraḥ

sarpākṣī kākamācī ca sahadevī ca bhṛṅgarāṭ /
kākatuṇḍīphalaṃ nimbaṃ parṇaṃ vākucibījakam

samūlāṃ devadālīṃ ca brāhmīmūlaṃ phalatrayam /
mūlaṃ ca vājigandhāyā nīlakoraṇḍapatrakam

samaṃ samaṃ kanyakāyā dravaiśca paribhāvayet /
saptāhaṃ śoṣayeccūrṇaṃ chāyāyāṃ trimadhuplutam

dvikarṣaṃ pratyahaṃ sevyaṃ vatsareṇa jarāṃ jayet /
ā candratārakaṃ jīvenmahābalayutaḥ sukham

<mahākāmeśvarakalpaḥ>
cāturjātakacoracandanajaladrākṣātugāreṇukaṃ kastūrītagarendukuṅkumajaṭākuṣṭhāśvagandhābdakam /
kaṅkolāmaradārucitrakaviṣaṃ dve jīrake saindhavaṃ bhārṅgīgokṣuradevapuṣpamusalīyaṣṭībalāphenakam

raṃbhākandaphalatrayaṃ trikaṭukaṃ jātīphalaṃ vāśakaṃ tālīśaṃ kaṭukīphalaṃ gajakaṇā māṣāmṛtāśarkarā /
picchābhṛṅgavidārikāmadanakaṃ bījaṃ ca kacchūdbhavaṃ śālmalyaṅghripunarnavāgaruśatāvaryapyatho dīpyakam

pādāṃśaṃ mṛtamabhrakaṃ ca vijayā tulyauṣadhānāṃ samā sarveṣāṃ sadṛśā sitā ca madhunā cājyena saṃyojitā /
jātīcampakaketakādikusumaiḥ seveta saṃvāsitaṃ karṣārdhaṃ niśi dehasiddhidamahākāmeśvaraḥ kāmadaḥ

puṃsāṃ śukravivṛddhidārḍhyakaraṇe kṣīrānupānaṃ hitaṃ śālmalyaṅghrijalānupānam athavāpyanyacca yacchukralam /
prauḍhānāṃ sudṛśāṃ sukhātisukhado vaśyo mahādrāvakaḥ saṅge bhaṅgurakāmakautukarasaḥ krīḍākalāmodadaḥ

saṃbhoge sthavirāgniyoṣiti made yūnāṃ smare darpahā nityānandanidānam ādipuruṣair apyāhitāsvādanaḥ /
vācāṃ siddhikaraḥ prakṛṣṭakavitāsaṃdarbhasaṃpādanaḥ saukhyārogyaviśeṣayauvanakalāsāmagryasaṃdhāyakaḥ

vṛddhatvaṃ harate balaṃ ca kurute mṛtyuṃ nirasyetparaṃ vyādhivrātam apākaroti kurute kāntiṃ nayatyārjavam /
yogābhyāsavidhau ratasya sulabhā siddhiṃ vidhattetarām aṃhaḥ saṃtatisaṃhṛtiṃ kalayate strīṇām apatyapradaḥ

rogāṇāṃ nicayaṃ kṣayaṃ kṣapayati kṣipraṃ mahārudgaṇaṃ vyāhanti śvasanaṃ layaṃ gamayate chinte ca kāsodayam /
durnāmāni ca ṣaḍbhinatti harate sarvārtirogolbaṇaṃ mehaughaṃ ca lunāti śoṇitadaraṃ vidhvaṃsate sevanāt

kṣīṇe poṣamupādadhāti vipulaṃ pūrṇātijīrṇojjvalaṃ mandāgniṃ grahaṇīṃ nikṛntatitarāṃ doṣānaśeṣānapi /
śreṣṭhaḥ sarvarasāyaneṣu viduṣāṃ bhogārthināṃ yogināṃ siddhiṃ samyagihātanoti vapuṣaḥ saṃsevanād anvaham

<mūlikākalpeṣu rasābhrakādimelanātideśaḥ>
mahāvṛkṣādikalpeṣu prokteṣveteṣu sādhakaiḥ /
eṣa sādhāraṇo yogaḥ kartavyaḥ siddhikāṅkṣibhiḥ

guñjāmātraṃ śuddhasūtaṃ vābhrakaṃ vā paṇadvayam /
kāntalohaṃ tathaivopayojayed bhakṣayennaraḥ

rasābhralohayogena sadyaḥ siddhimavāpnuyāt /
jīvahīno yathā deho gandhahīnaṃ prasūnakam

tathaiva mūlikākalpā rasahīnā na siddhidāḥ /
tasmādrasena sahitāḥ sadyaḥ siddhipradāyakāḥ

<abhyaṅgarasāyanam; mahānīlītailam>
mahānīlīrasaṃ prasthaṃ prasthaṃ bhṛṅgarasaṃ priye /
dhātrīphalarasaṃ prasthaṃ kākatuṇḍīphalodbhavam

prasthaṃ kaṣāyatilajaṃ tailaprasthaṃ ca gopayaḥ /
āḍhakaṃ yojayetsarvaṃ kākatuṇḍīphalaṃ palam

tripalaṃ cāmalaṃ bhṛṅganīlīpatrarajaḥ palam /
piṣṭvā tasmin kṣipet sarvaṃ pacenmandāgninā priye

tailāvaśiṣṭaṃ vipacettato vastreṇa śodhayet /
tailenānena cābhyajya śiro'bhyaṅgaṃ samācaret

pratyahaṃ karṇapūraṃ ca evaṃ kuryādrasāyanam /
keśā bhramarasaṅkāśāḥ śrotraṃ digantapāṭavam

jatrūrdhvarogā naśyanti tathā pādahitaṃ bhavet /
<candanādyaṃ tailam>
candanāgarukarpūrakastūrīkuṅkumaṃ tathā

uśīradvayakaṅkolajātīphalalavaṅgakam /
nalikānaladāspṛkkāturuṣkasthāṇulocanam

hareṇustagaraṃ lākṣā nakhaṃ sthauṇeyakaṃ murā /
naladāmalakaṃ kuṣṭhaṃ corakaṃ kaṭukīphalam

prapauṇḍarīkaṃ kharjūraṃ padmakaṃ jātipattrikā /
śaileyaṃ dhātakīpuṣpaṃ saralaṃ cailavālukam

pūgīphalaṃ saptaparṇaṃ tathā tāmalakaṃ priye /
ekaikaṃ karṣamātraṃ syātprasthaṃ tailaṃ ca gopayaḥ

āḍhakaṃ tatpacetsarvaṃ tailaśeṣaṃ samāharet /
tasmin mṛgāṇḍaṃ kastūrīṃ karpūraṃ kuṅkumaṃ kṣipet

pṛthakkarṣaṃ ca jātyādikusumair vāsayedbudhaḥ /
tenābhyaṅgam adhaḥkāye kuryād daurgandhyanāśanam

aśītivarṣadeśīyo 'pyasau syāt ṣoḍaśābdakaḥ /
kāminīlokakandadarpaḥ subhagaḥ śuklavṛddhimān

yoṣicchataṃ ca ramate sa jīveccharadaḥ śatam /
<udvartanarasāyanam>
athodvartanamākhyāmi valīpalitabhañjanam

sūtaṃ gandhaṃ samaṃ mardyaṃ stanadugdhena yoṣitaḥ /
muṇḍikā meghanādaśca viṣṇukrāntā munistathā

sarpākṣī ca dravairāsāṃ dinamekaṃ vimardayet /
etaddaśaguṇaṃ kṣārastilasya ca yavasya ca

etatsarvaṃ samadhvājyamanenodvartanaṃ vapuḥ /
valīpalitanāśaḥ syād varṣāt triśatavatsaraḥ

jīveddivyavapur bhūtvā sādhako nātra saṃśayaḥ /
sanālamutpalaṃ sūtaṃ saptāhaṃ parimardayet

ātmīyaśivatoyena tataścāṅgaṃ vimardayet /
vatsarājjāyate siddhiḥ pūrvavad divyavigrahaḥ

śivāṃbhasā ca sūtendraṃ brahmadaṇḍīyamūlakam /
mardayetsaptadivasaṃ samyagdevi vimardayet

vatsarājjāyate siddhiḥ pūrvavaddivyavigrahaḥ /
kaṭutailena surabhiṃ bhāvayeddinasaptakam

palārdhaṃ bhakṣayennityaṃ varṣād vajravapur bhavet /
triśatāyuḥsvarṇavarṇo valīpalitavarjitaḥ

samadhvājyaṃ kuṣṭhacūrṇaṃ karṣaṃ prātarlihennaraḥ /
śatapuṣpasugandhāṅgo jīvedvalivivarjitaḥ

<keśarañjanakalpāḥ>
kākatuṇḍīphalaṃ kāntacūrṇamāmrāṇḍatailakam /
āloḍya bhāṇḍe nikṣipya māsaṃ dhānyamaye kṣipet

uddhṛtya lepayecchīrṣaṃ nasyakarmāmunā bhavet /
tryahāt keśāḥ sunīlāḥ syuḥ ṣaṇmāsāt keśarañjanam

harītakī niṣkamekaṃ dvipalaṃ kāntacūrṇakam /
palamekaṃ nāgacūrṇamamladadhnā pramardayet

abhyakto nikṣipenmūrdhni mardayennāḍikārdhakam /
eraṇḍapatraiḥ saṃveṣṭya punarvastreṇa bandhayet

snāyātpunaśca tridinaṃ pūrvavatkeśarañjanam /
samūlau nīlikābhṛṅgāvayaścūrṇaṃ varāsamam

cūrṇameḍakamūtreṇa dinamekaṃ ca bhāvayet /
snānādi pūrvavatkṛtvā pūrvavatkeśarañjanam

nistvagguñjāphalaṃ cailā devadāru ca kuṣṭhakam /
samaṃ cūrṇaṃ bhṛṅgarasair bhāvyam ekadinaṃ priye

anyaccūrṇaṃ tailaṃ pacenmṛdvagninā budhaḥ /
yasya tailaghṛtābhyaṅgātkeśā bhramarasannibhāḥ

hastidantasya dagdhasya samabhāgaṃ rasāñjanam /
chāgīdugdhena saṃpeṣya lepanātkeśarañjanam

kṛṣṇamṛttriphalābhṛṅgarasāyaścūrṇakaṃ samam /
āloḍyainaṃ samaṃ bhāṇḍe māsamekaṃ nirodhayet

tallepāccikurāḥ kṛṣṇā bhaveyuḥ pañcamāsataḥ /
dhātrīphalaṃ japāpuṣpaṃ kiṭṭaṃ piṣṭvā ca mūrdhani

lepayettridinaṃ tena keśāḥ syur bhramaropamāḥ /
cūrṇaṃ sindūrasadṛśaṃ tayostulyā ca sāṃbraṇiḥ

piṣṭvāṃbhasā pralepena tatkṣaṇāt keśarañjanam /
gorocanaṃ kṛṣṇatilān śatapuṣpāṃ śivāṃbunā

kākamācīmidaṃ sarvamayaḥpātre vimardayet /
tenaiva divasādūrdhvaṃ keśarañjanamuttamam

cūrṇaṃ siddhārthakaṃ sarjo yavakṣāraṃ ca kāñjikaiḥ /
nāgapuṣparasaiḥ peṣyaṃ lepanaṃ keśarañjanam

kadalīkandacūrṇaṃ ca sindūrāṅgārakau tathā /
rasairjambīrajair lohamuṣṭyāyaḥpātrake piṣet

dinaikalepanāttena keśānāṃ rañjanaṃ bhavet /
kāsīsaṃ nīlikāpatraṃ dadhibhṛṅgarasastathā

samāṃśaṃ lohacūrṇaṃ ca lepanātkeśarañjanam /
nāgadaṇḍena patrāṇi koraṇṭasya ca mardayet

dinatrayaṃ ca tallepāt keśāḥ syur bhramaropamāḥ /
varā bhṛṅgī cūtabījaṃ mṛṇālaṃ ca priyaṅgukam

nīlī niśā lohanāgau cūrṇitā niṃbatailakaiḥ /
kāntapātre loḍayitvā māsamekaṃ vibhāvayet

tena liptāḥ kacāḥ kṛṣṇā rañjitā bhramaropamāḥ /
tilāḥ kṛṣṇāḥ kākamācībījāni samabhāgataḥ

tattailayantrato grāhyaṃ tena syātkeśarañjanam /
karṣaṃ japārasaḥ kṣaudraṃ saptāhaṃ nasyamācaret

tadūrdhvaṃ rañjayet keśān sarvanasyottamo hyayam /
bhṛṅgarājarasaiḥ piṣṭvā triphalāṃ lohacūrṇakam

tailam etatsamaṃ yojyaṃ tathā bhṛṅgarasaiḥ punaḥ /
mṛdvagninā pacetsarvaṃ tailaśeṣaṃ yathā bhavet

snigdhabhāṇḍe ca tattailaṃ māsaṃ bhūmau vinikṣipet /
tailena lepayecchīrṣaṃ kāravallīdalaiḥ purā

veṣṭayettattu vastreṇa nivāte kṣīrabhojanam /
kṣālayet triphalākvāthaiḥ kuryāt saptadinaṃ priye

kapālarañjanaṃ kuryād yāvajjīvaṃ na saṃśayaḥ /
śriyālīkākatuṇḍyāśca bījaṃ nirguṇḍikārasaiḥ

japāpuṣparasair bhāvyaṃ pṛthak dinacatuṣṭayam /
pātālayantre tattailaṃ pātayettena lepanam

kuryānmūrdhni ca gandharvapattraiśca pariveṣṭayet /
vastreṇa ca tato vātaśūnyadeśe vasansudhīḥ

kṣīrāśī kāñjike snānaṃ kuryātsaptadinaṃ tviti /
keśā bhramarasaṅkāśā yāvajjīvaṃ na saṃśayaḥ

jalamaṇḍanikākākamācībhṛṅgāḥ samāḥ samāḥ /
piṣṭvā tailaṃ pacetsūpaṃ punastailena lepayet

mūrdhānaṃ lepayettena saptāhaṃ keśarañjanam /
snānabhojanaśayyāṃ ca pūrvavatparikalpayet

varābhṛṅgarasaiḥ piṣṭvā kāntapātre vilepayet /
avāṅmukhaṃ viniṣṭhāpya prātastaṃ bhṛṅgarāḍrasaiḥ

punaḥ piṣṭvā lihecchīrṣaṃ kṣālayet triphalāṃbunā /
ekaviṃśaddinaṃ kuryāt pūrvavat phalam āpnuyāt

garalaṃ kṛṣṇajīraṃ ca piṣṭvā ruddhvā ca tanmukham /
gṛhāṅgaṇe paṅkile ca khanitvā sthāpayet sudhīḥ

ṣaṇmāsāt taddravībhūtaṃ kṛṣṇaṃ sādhu samuddharet /
śiromadhye kṣipet karṣaṃ pūrvavad veṣṭanādikam

ā janma rañjayetkeśāṃstacca kāpālarañjanam /
bhṛṅgī nīlī varā kṛṣṇāyasaṃ madanabījakam

koraṇṭakusumaṃ cūrṇamarjunasya tvacodbhavam /
ambhojamūlaṃ jambvāśca tatsarvaṃ ca samāṃśakam

lohabhāṇḍagataṃ kuryātpakṣaṃ bhūmau vinikṣipet /
haredbhāṇḍagataṃ kalkaṃ kalkāttailaṃ caturguṇam

tailāccaturguṇaṃ bhṛṅgarasas tasmāccaturguṇaḥ /
varākvāthaḥ sarvamidaṃ mandavahnau vipācayet

tailāvaśiṣṭaṃ vipacet tatpiṣṭvāyasapātrake /
nikṣipecca parīkṣārthaṃ kākapakṣaṃ vilepayet

tailena yadi kṛṣṇaṃ tadauṣadhaṃ siddhidaṃ bhavet /
sādhako māsam ekaṃ tu tasminpātre vipācitam

tena liptāḥ kacāstasya ṣaṇmāsādbhramaropamāḥ /
ciñcāśvatthapalāśānāṃ vāsāyāśca dravairmuhuḥ

drutaṃ pātragataṃ nāgaṃ cālayed bhasmatāṃ vrajet /
tāvat pacennāgabhasma palaṃ lohasya cūrṇakam

dvipalaṃ ca varācūrṇaṃ tripalaṃ dāḍimatvacaḥ /
palaṃ caitatsarvasamaṃ kāñjikaṃ lohabhājane

loḍayet pācayet kiṃcit kṣaṇaṃ tallohapātrake /
ātape dhārayed bhṛṅgakoraṇṭarasabhāvitam

ekaviṃśaddinaṃ bhāvyaṃ bhūyo bhūyo dravaṃ dravam /
tenaiva liptāścikurāḥ piñchatāpiñchasannibhāḥ

kacarañjanayogeṣu kathitākathiteṣu ca /
niśi lepaṃ tathairaṇḍapatraiśca pariveṣṭanam

prātaḥ snānamidaṃ karma sarvasādhāraṇaṃ smṛtam /
<divyauṣadhigrahaṇayogyasthalanirdeśaḥ>
śmaśāne salile mārge gṛhe devālaye tathā

malamūtrayutasthāne grāme goṣṭhe taroradhaḥ /
chāyāyāṃ ca viṣaprāye kuśīte cānyabādhite

evaṃprāyeṣu deśeṣu na grāhyā siddhamūlikā /
araṇye parvate tīre nadyā tapavane śucau

śilāsaṅgiśucikṣetre siddhakṣetre 'bdhirodhasi /
śrīparvate himagirau taṭāke vijane hrade

gṛhṇīyānmūlikā jātā dehasiddhipradāyikāḥ /
<divyauṣadhigrahaṇavidhiḥ>
sarveṣāṃ siddhamūlānāṃ rakṣābandhanakarmaṇi

khananeṣūtpāṭaneṣu grahaṇeṣu krameṇa vai /
kathyante manavo divyāḥ sarvasādhāraṇāḥ smṛtāḥ

pūrvedyureva susnātaḥ kṛtadantaviśodhanaḥ /
anuliptaḥ śuddhavastro hṛṣṭaḥ saṃyatamānasaḥ

maunī gandhākṣatopeto rakṣābandhanasūtritām /
pūrvam anveṣitāṃ gatvā mūlikāṃ sveṣṭadāyikām

vitṛṇaṃ paritaḥ kṛtvā khātvāmbu pariṣecayet /
gandhapuṣpākṣataiḥ pūjāṃ kṛtvā sūtreṇa bandhayet

samantrakaṃ sādhakendraḥ sopavāso jitendriyaḥ /
atraiva tiṣṭha kalyāṇi mama kāryakarī bhava

mama kāryakarī siddhā tataḥ svargaṃ gamiṣyasi /
oṃ hrīṃ namaste 'mṛtasambhūte balavīryavivardhini balamāyuśca me dehi pāpaṃ me jahi dūrataḥ /
hrīṃ phaṭ /
anenaiva tu mantreṇa tridhā sūtreṇa veṣṭitam

rakṣāṃ badhnīta tāṃ spṛṣṭvā japedaṣṭottaraṃ śatam /
tataḥ prātaḥ samutthāya kṛtvā nityavidhiṃ śuciḥ

mūlikāṃ tāṃ samāsādya gandhapuṣpākṣatādibhiḥ /
sarvopacāraiḥ sampūjya baliṃ dadyāt sahetukām

samantrakaṃ khaneddhīmānmantro 'yamapi kathyate /
yena tvāṃ khanate brahmā yena tvāṃ khanate bhṛguḥ

yenendro varuṇo viṣṇustena tvāmupacakrame /
tvāmevāhaṃ khaniṣyāmi mantrapūtena pāṇinā

evaṃ samprārthayitvādau paścānmantraṃ samuccaret /
oṃ śrīṃ hrīṃ taṃ amṛteśvari ehi ehi mama sakalasiddhiṃ kuru huṃ phaṭ /
anenaiva tu mantreṇa nikhanet siddhimūlikām

atha tūtpāṭayettāṃ tu prāñjaliḥ prārthayediti /
mā utpate mā nipate mā ca te cānyathā bhavet /
oṃ hrīṃ caṇḍa huṃ phaṭ svāhā /
utpāṭayedanenaiva mantreṇa parameśvari /
acchinnamūlāmādāya śuddhavastrābhiveṣṭitām

kṣiptvā paṭalikāyāṃ ca svaveśmani śucisthale /
nicaye hṛṣṭamanasā nidadhyāt pāraṇaṃ tataḥ

oṃ namo bhairavāya mahāsiddhipradāyakāya āpaduttaraṇāya huṃ phaṭ /
anenaiva tu mantreṇa gṛhītvā gṛhamānayet