Ahirbudhnya Samhita · Chapter 26

mahāsudarśanayantralakṣaṇaṃ nāma ṣaḍviṃśo'dhyāyaḥ
dhyātaṃ sakṛdbhavānekakoṭyaghoghaṃ haratyaram/
sudarśanasya taddivyaṃ bhargo devasya dhīmahi//
vistareṇa mahāsudarśanayantralakṣaṇapraśnaḥ
nāradaḥ---
vistareṇāsya yantrasya saṃsthānaṃ lakṣaṇaṃ tathā/
śrotumicchāmi bhagavaṃstanmamācakṣva pṛcchataḥ

tatprativacanapratijñā
ahirbudhnyaḥ---
vistareṇa pravakṣyāmi svarūpaṃ lakṣaṇaṃ tathā/
asya yantrasya devarṣe tanme kathayataḥ śrṛṇu

yantranirmāṇadravyāṇi
rajatena suvarṇena lohairvā śilayāpi vā/
yathādhikāraṃ yantrasya kuryādarcāṃ tu sādhakaḥ

yantralekhanasādhanadravyāṇi
dhātucandanakarpūrakuṅkumāgurujai rasaiḥ/
suvarṇasūcyā yadi vā 1yantrametallikhet paṭe

--------------------------------------
1. yantraṃ tat kārayet paṭe D
---------------------------------------
yantramadhye saudarśanapuruṣalekhanam
candramaṇḍalamadhye tu tāraṃ kuryāt samāhitaḥ/
tasya madhye 2likhed devaṃ raktavarṇaṃ sudarśanam

tatsvarūpavarṇanam
piṅgākṣaṃ piṅgakeśāḍhyaṃ raktāmbaradharaṃ vibhum/
yuktaṃ ṣoḍaśabhirhastairaṣṭābhirvā mahādyutim

pāśāṅkuśābjamusaladhanuḥ śaṅkhagadāribhiḥ/
bhīṣaṇairāyudhavarairupetaṃ jayināṃ varam

tadviṣṇoḥ paramaṃ rūpaṃ nityaṃ taijasavigraham/
daṃṣṭrāniṣṭhyūtasaptārcirjvālāpallavitānanam

bhūṣaṇairbhūṣitaṃ citrairbhīṣaṇaṃ romaharṣaṇam/
svatejasā jagat sarvaṃ pūrayantaṃ mahābalam

nirbhidyamānadaiteyaśoṇitāśanalampaṭam/
udyatpradyotanaśataprakhyaṃ vikhyātapauruṣam

3manastattvena satataṃ saṃśritaṃ vegavattayā/
nārāyaṇakarāmbhojasevārasaviśāradam

javena viṣṇucintāyāḥ paramaṃ mārgadarśinam/
smṛtyaiva svānuraktānāṃ dṛṣṭādṛṣṭārthasādhanam

svabhaktapratyanīkānāṃ māraṇaṃ surapūjitam/
--------------------------------------
2.nyaseddevam D
3.namastattvena A C
-------------------------------------
4saṃstūyamānacaritaṃ siddhagandharvadānavaiḥ

tasya sarvaśaraṇyatvaṃ nirdoṣatvaṃ kalyāṇaguṇākaratvaṃ ca
bhaktāribhañjanaparaṃ śaraṇyaṃ śaraṇārthinām/
nityaniḥ sīmanirdoṣakalyāṇaguṇasāgaram

tatpādaprānte sādhakanāmalekhanam
evaṃbhūtaṃ samālikhya sadānandaṃ sudarśanam/
tatpādapadmaparyante sādhakaṃ nāma vinyaset

tataḥ paryante ṣaṭkoṇacakralekhanam
indubimbasya paryante ṣaṭkoṇaṃ cakramālikhet/
āgneyamamitaprakhyamamoghaṃ sarvasādhakam5

tatra ṣaḍakṣaravinyāsaḥ
prācyādidikṣu koṇeṣu ṣaḍ varṇān vinyasenmanoḥ/
aṅgamantranyāsaḥ
ṣaṭsu koṇāntarāleṣu tvaṅgamantrān nyaset kramāt

tataścaturdalapadmalekhanam
asmādbahistathā padmaṃ caturdalasamanvitam/
tatra nyasanīyā varṇāḥ
sabinduvarma phaṭ cāsya daleṣveṣu kramānnyaset

-------------------------------------------
4.saṃstūyamānamaniśam D
5.ghātakam A D
-----------------------------------------
antarāleṣvantaḥ sthavarṇavinyāsaḥ
dalāntarāleṣvantaḥ sthān vinyaset sādhakastathā/
tataḥ ṣoḍaśakesarāṣṭadalapadmalekhanam
bāhyo tatrāṣṭapatrābjamantaḥ ṣoḍaśakesaram

kesareṣu ṣoḍaśasvaravinyāsaḥ
kesareṣu kramādasya vilikhet ṣoḍaśa svarān/
daleṣvaṣṭākṣaramantranyāsaḥ
aṣṭākṣaraṃ mahāmantraṃ daleṣvasya samālikhet

dvātriṃśatkesaraṣoḍaśadalapadmalekhanam
dvātriṃśatkesaraṃ cāsya bahiḥ ṣoḍaśapatrakam6/
kesareṣu kādisāntavarṇavinyāsaḥ
kakārādi sakārāntaṃ kesareṣvasya cālikhet

daleṣu ṣoḍaśārṇamantravarṇanyāsaḥ
daleṣvasya likhenmantraṃ ṣoḍaśārṇaṃ tu vaiṣṇavam/
dvātriṃśatkesaradalapadmalekhanam
dvātriṃśatkesaradalaṃ bāhye tasya samālikhet

kesareṣu vārāhānuṣṭubhamantravarṇanyāsaḥ
kesareṣvasya padmasya prācyādiṣu yathākramam/
--------------------------------------
6.patragam B C E F
--------------------------------------
mantramānuṣṭubhaṃ 7samyagvārāhaṃ vilikhet param

daleṣu nārasiṃhānuṣṭubhamantravarṇanyāsaḥ
dvātriṃśati daleṣvasya nārasiṃhaṃ kramāllikhet/
ānuṣṭubhaṃ mahāmantramamoghaṃ sarvasādhakam

catuḥ ṣaṣṭidalapadmalekhanam
tasya bāhye likhet padmaṃ catuḥ ṣaṣṭidalairyutam/
taddaleṣu pātālanārasiṃhamantranyāsaḥ
pātālanārasiṃhākhyaṃ 8naddaleṣu nyasenmanum

punaraṣṭadalapadmalekhanam
punaśca padmaṃ vinyasya dalairaṣṭabhirāvṛtam/
taddaleṣvaṣṭākṣaranārasiṃhamantranyāsaḥ
aṣṭākṣaraṃ nārasiṃhaṃ taddaleṣu samālikhet

tadvahirmāhendramaṇḍalakalpanam
tadbāhye maṇḍalaṃ kuryānmāhendraṃ vajrabhūṣitam/
jājvalyamānaṃ svenaiva sarvālaṃkāramaṇḍitam

tadbihiḥ sādhakanāmnā saha tadbījanyāsaḥ
tasya bāhye mahādikṣu prāgādiṣu yathākramam/
---------------------------------------
7.syādvai vārāham A E F;sattvairvārāham B C
8.taddalairvinyasenmanum A B C; taddale vinyasenmanum E F
----------------------------------------
tadbījaṃ vinyasedvīmānnijanāmnā 9samanvitam

bahiṣkoṇeṣvantaḥ sthavarṇanyāsaḥ
bahiṣkoṇeṣu caturṣu tathāntaḥsthān prakalpayet/
koṇāntarāleṣu tadbījanyāsaḥ
koṇābhyantarabhāgeṣu tadvījaṃ vinyaset punaḥ

tatparitaḥ svarāṇāṃ prātilomyena vinyāsaḥ
paritastat svarān sarvān prātilomyena cālikhet/
tatparitaḥ sādikāntākṣaravinyāsaḥ
sakārādi kakārāntaṃ vinyaset paritastathā

svanāmnā pāśāṅkuśābhyāṃ cāveṣṭanam
vidarbhitaṃ svanāmnaiva 10parito'ntyayugaṃ 11nyaset/
12pāśenāveṣṭayedetadaṅkuśena tathāturaḥ

bhūpurakalpanam
puṭitaṃ bhūpuraṃ tasya bāhye kuryādatandritaḥ/
samantāt keśavādimūrtinyāsaḥ
keśavādīn mūrtimataḥ samantādasya vinyaset

------------------------------------
9.samāyutam D
10.parito'nyayugam A B D F
11.likhen A B C E F
12.pāśena veṣṭyet A B C E F
-------------------------------------
keśavasvarūpavarṇanam
taptajāmbūnadaprakhyaṃ puṇḍarīkāyatekṣaṇam/
apārakaruṇaṃ padmaśaṅkhacakragadādharam

pītāmbaradharaṃ devaṃ vanamālāvibhūṣitam/
hārakeyūrakaṭakakuṇḍalairupaśobhitam

caturbāhumudārāṅgaṃ prasannavadanaṃ 13vibhum/
prāgādi vinyased devaṃ keśavaṃ kleśanāśanam

nārāyaṇasvarūpavarṇanam
śaṅkapadmagadācakradharaṃ nīlāmbudacchavim/
sarvālaṃkārasaṃyuktaṃ kuryānnārāyaṇaṃ 14tataḥ

mādhavasvarūpavarṇanam
padmakaumodakīśaṅkhacakradhāriṇamavyayam/
devamindīvaraśyāmaṃ mādhavaṃ bhāvayet tataḥ

govindasvarūpavarṇanam
cakrakaumodakīśaṅkhapadmāyudhavirājitam/
indubimbanibhaṃ kuryād govindamamitaujasam

viṣṇusvarūpavarṇanam
gadābjaśaṅkhacakrāstradharaṃ paramabhūṣitam/
viṣṇu viśvapatiṃ kuryāt padmakiñjalkasaṃnibham

----------------------------------------
13.param A B C E F
14.param A B C E F
---------------------------------------
madhusūdanasvarūpavarṇanam
cakraśaṅkhāmbujagadādhāriṇaṃ karuṇānidhim/
raktapadmadalaprakhyaṃ bhāvayenmadhusūdanam

trivikramasvarūpavarṇanam
cakrakaumodakīpadmaśaṅkhasevitamīśvaram/
ujjvalatkanakaprakhyaṃ taṃ kurvīta trivikramam

vāmanasvarūpavarṇanam
śaṅkhacakragadāpadmadharaṃ paramabhūṣitam/
taruṇādityasaṃkāśaṃ vāmanaṃ bhāvayet tataḥ

śrīdharasvarūpavarṇanam
padmacakragadāśaṅkhadharaṃ sadguṇasāgaram/
puṇḍarīkanibhaṃ devaṃ śrīdharaṃ parikalpayet

hṛṣīkeśasvarūpavarṇanam
gadāsudarśanayute śaṅkhapadme ca bibhratam/
vidyutprabhaṃ hṛṣīkeśaṃ kurvīta kamalekṣaṇam

padmanābhasvarūpavarṇanam
śaṅkhapadme gadācakre tathā bibhrāṇamujjvalam/
sahasrādityasaṃkāśaṃ padmanābhaṃ tu kārayet

dāmodarasvarūpavarṇanam
padmaśaṅkhagadācakradharaṃ bandhūkasaṃnibham/
bhaktyekasulabhaṃ devaṃ dāmodaramatha smaret

namo'ntānāṃ tattannāmnāmapi lekhanam
evaṃ krameṇa nyasyaitāneṣāṃ nāmāni ca nyaset/
namo'ntānyamuktaṃ rakṣa rakṣeti ca samantataḥ

prāgādiṣu prādakṣiṇayena bījākṣaranyāsaḥ
yaṃ śaṃ raṃ ṣaṃ tathā laṃ saṃ vaṃ haṃ ceti dvayaṃ dvayam/
prācyādiṣu mahādikṣu prādakṣiṇyena vinyaset

aiśānyādiṣvaprādakṣiṇyena bījākṣaranyāsaḥ
yaṃ śaṃ raṃ ṣaṃ tathā laṃ saṃ vaṃ haṃ ceti yugaṃ yugam/
15aiśānyādiṣu koṇeṣu vinyasedapradakṣiṇam

punaḥ pāśāṅkuśābhyāṃ veṣṭanam
pāśena tu samāveṣṭya 16aṅkuśenāpi veṣṭayet/
sarvametat sabījena17 hṛllekhamanunā vṛtam

prāgādicaturdikṣu viṣṇuvinyāsasteṣāmāyudhāni ca
prāgādiṣu caturdikṣu vinyased viṣṇumavyayam/
cakrakaumodakīśārṅgakhaḍgairyuktaṃ yathākramam

sādhāraṇau ca sarveṣāṃ saṅkhacakrau varāyudhau/
---------------------------------------
15.īśānyādiṣu A B C E F
16.aṅkuśena tu A B C E F
17.sajīvena A B C E F
---------------------------------------
āgneyādikoṇeṣu hṛṣīkeśanyāsaḥ
āgneyādiṣu koṇeṣu hṛṣīkeśaṃ tato nyaset

teṣāmāyudhaviśeṣāḥ
śaṅkhaṃ halaṃ ca musalaṃ śūlaṃ caiteṣu dhārayet/
koṇāntarāleṣvaṣṭasu janārdanavinyāsaḥ
vikoṇeṣvaṣṭasu tathā janārdanamatho nyaset

teṣāmāyudhaviśeṣāḥ
daṇḍaṃ kuntaṃ tathā śaktiṃ paśamaṅkuśameva ca/
vajraṃ tathaiva paraśuṃ tathā śatamukhānalam

kareṣvamīṣāmetāni vilikhettu yathākramam/
tattatpārśveṣu tattatparīvāralekhanam
pratyekaṃ parivārāṃstu teṣāṃ pārśveṣu vinyaset

tato bhūmau bhūmyā saha puruṣottamasmaraṇam
varāharūpiṇaṃ devaṃ śaṅkhacakragadādharam18/
bhūmau ca sahitaṃ bhūmyā saṃsmaret puruṣottamam

ambare narasiṃhasmaraṇam
ambare nārasiṃhaṃ tu cintayedamitaujasam/
bhīṣaṇaṃ ghaṭitānekabhūṣaṇaṃ dāritāsuram

--------------------------------------------
18.cakradharaṃ param A B C E F
-------------------------------------------
prāgādiṣu cakragadāśārṅgakhaḍgasmaraṇam
prācyāṃ diśi mahājvālāgataṃ cakraṃ smaredbudhaḥ/
dakṣiṇasyāṃ diśi tathā smarejjvālāgatāṃ gadām

pratīcyāṃ śārṅgamatyugrajvālāmadhyagataṃ smaret/
uttarasyāṃ diśi tathā smaret khaḍgaṃ sudāruṇam

asya yantrasyāparāṅgakalpanāya madhye caturviṃśatyaracakrakalpanam
aparāṅge'tha yantrasya madhye cakrābjasaṃsthitam/
caturviṃśatyaraṃ cakraṃ sunemi rucirākṛti

tanmadhye dvādaśadalapadmalekhanam
madhyecakraṃ nyaset padmaṃ yuktaṃ dvādaśabhirdalaiḥ/
tatkarṇikāyāmāgneyamaṇḍalanyāsaḥ
cakrābjakarṇikāsthāne nyasedāgneyamaṇḍalam

tanmadhye yoganṛsiṃhalekhanam
tanmadhye yogapaṭṭena pinaddhāṅgaṃ sanātanam/
nārasiṃhaṃ caturbāhuṃ catuścakradharaṃ param

samāsīnamaśokasya mūle kālānaladyutim/
sarvābharaṇasaṃyuktaṃ sarvabhaktārtihāriṇam

apārasaṃkhyakalyāṇaguṇapūrṇamahārṇavam/
bhaktānukampinaṃ nityaṃ sarvalokaikanāyakam

tatpādaparyante dvayostadbhṛtyayorvinyāsaḥ
evaṃ vinyasya tatpādaparyante 19vinyasedubhau/
tadājñākāriṇau bhīmau nīlanīradavigrahau

udagrakāyau bhīmākṣau bhīmāyudhadharau varau/
daṃṣṭrākarālavadanau 20vinyased vṛttalocanau

cakrasya prāgādiṣvaṣṭaśaktidhyānam
cintayedatha cakrasya samantādaṣṭa yoṣitaḥ/
ūrdhvamābaddhakeśāḍhyāstacchaktīḥ prāptayauvanāḥ

sarvālaṃkārasaṃyuktā dvibhujā mālyadhāriṇīḥ/
prācyāṃ diśi jayāṃ devīṃ 21pītavarṇāṃ vicintayet

āgneyyāṃ mohinīṃ devīṃ śyāmalāmāyatekṣaṇām/
yāmyāmanusmared devīṃ vijayāṃ kṛṣṇarūpiṇīm

raktavarṇāṃ tathā devīṃ nairṛtyāṃ hlādinīṃ tathā/
ajitāṃ pītavarṇāṃ tu pratīcyāṃ saṃsmaret parām

vāyavyāṃ diśi māyāṃ tu kṛṣṇavarṇāṃ sanātanīm/
udīcyāṃ raktavarṇāṃ tāmāśāyāmaparājitām

aiśānyāṃ saṃsmaret siddhiṃ dhūmravarṇāmataḥ param/
yathoktalakṣaṇayantramahimā
evametanmahāyantraṃ mahāpātakanāśanam

------------------------------------
19.cintayedubhau A B C E F
20.vinyasyau D
21.sitavarṇām A D E F
------------------------------------
āyurārogyadhanadaṃ putramitrakalatradam/
sarvavighnopaśamanaṃ sarvaduṣṭanivāraṇam

yo yadarthī likhedyantraṃ tat tadasya prayacachati/
maṇividrumamuktāḍhyaṃ kuryād yantraṃ hiraṇmayam

rājā cedrājyamāpnoti niṣkaṇṭakamanāmayam/
bhūrjapatralikhitasyāpi yantrasya sarvaphalasādhanatā
bhūrjapatre likhitvaitat kuṅkumaiścandanena tu

yo martyaḥ śirasā dhatte tasya syāt sarvamīpsitam/
piśācoragarakṣāṃsi kṣipraṃ naśyanti tasya vai

etadyantraśilāpratiṣṭhāyā muktisādhanatvam
śilāpratiṣṭhāṃ yaḥ kuryādetasya jagatītale/
sarvān kāmānihāvāpya viṣṇusāyujyamāpnuyāt

lohādibhiryantrapratimānirmāṇaphalam
lohairvā rajatenātha yaḥ kuryāt pratimāṃ budhaḥ/
trivargaphalamāpnoti nirvāṇamacirāt punaḥ

karṣaṇādipratiṣṭhāntāyatananirmāṇaphalam
karṣaṇādi pratiṣṭhāntaṃ kuryādāyatanaṃ ca yaḥ/
āpnuvanti ca tadvaṃśyāḥ puṇyalokānanuttamān

bhayādiṣu yantrasmaraṇae phalam
bhayāgame ca saṃgrāme vāde vā yaḥ smaredidam/
vijayastasya hastastho nātra kāryā vicāraṇā

trisaṃdhyaṃ yantrārcanaṃ muktisādhanam
arcayedyastrisaṃdhyaṃ vai yantrametadanuttamam/
tāpatrayavinirmukto viṣṇuloke mahīyate

rakṣāvidhau rājñāṃ vaiśeṣikavidhyārambhaḥ
rājñāṃ rakṣāvidhāne tu viśeṣaṃ śrṛṇu nārada/
rājyārthī hṛtarājyo vā paribhūto'thavā nṛpaiḥ

tatra prathamamācāryapūjāvidhiḥ
saudarśanasya yantrasya pradātāraṃ guruṃ param/
sarvebhyo hyadhikaṃ matvā tamabhyarcyaṃ mahādhanaiḥ

tato bhagavadārādhanavidhiḥ
tato nārāyaṇaṃ devaṃ puṇḍarīkāyatekṣaṇam/
śyāmalaṃ pītavasanaṃ sarvābharaṇabhūṣitam

ārādhayeccaturbāhumācāryoktavidhānataḥ/
tato yantranirmāṇam
taptajāmbūnadamayaṃ maṇividrumacitritam

sarvālaṃkārasaṃyuktaṃ kārayedyantramuttamam/
yantranirmāṇasya rājyaprāptihetutvam
etatkaraṇamātreṇa rājyamāpnotyanāmayam

pratiṣṭhāpūrvakārcanasya saptadvīpāntabhūmiprāptihetutvam
pratiṣṭhāpyārcayedetat sādaraṃ sarvasiddhidam/
tato bhūmimavāpneti saptadvīpāṃ sapattanām

antatastrailokyapālayitṛtvasiddhiḥ
vaśyā bhavanti satataṃ siddhagandharvadānavāḥ/
trailokyarājyamakhilaṃ pālayatyavanītale

parakṛtābhicāraparāvartanasiddhiḥ
abhicārāḥ parakṛtāścainamaprāpya 22bhīṣitāḥ/
praviśanti prayoktāramāpagevācalāhatā

avagrahādiparihārasiddhiḥ
avagrahāśca naśyanti śatravo vidravanti ca/
apamṛtyumṛgavyālacorarogādibhirbhayam

na tasya rājye bhavati vidyate tatkule balam/
sarveṣāṃ svadharmapravṛttisiddhiḥ
sarve sveṣveva dharmeṣu pravartante sadā mune

----------------------------------------
22.dīpitāḥ D
-----------------------------------------
durvāsasā saptasyendrasya yantreṇānena punaḥ svapadaprāptiḥ
purā durvāsasaḥ śāpāddhṛtarājye śacīpatau/
etatprasādādakhilaṃ punaḥ prāpa triviṣṭapam

caturmukhasya bhagavatsakāśādyantraprāptiḥ
etat purā mahāyantraṃ brahmaṇe proktavān hariḥ/
caturmukhena viśvakarmaṇā yantravimānayornirmāpaṇam
brahmā ca viśvakarmāṇamāhūyaitadakārayat

vimānaṃ ca tadārabhya devagandharvadānavāḥ/
tadā prabhṛti yantrasyaiva rakṣāsādhanatvam
anena rakṣaṇavidhiṃ cakruḥ pūrve nṛpāstathā/
tasmādrājñāṃ ca sarveṣāmeṣa rakṣāvidhiḥ paraḥ

adhyāyārthanigamanam
abhinavadinanāthaprojjvaladbimbatulyaṃ
kamalabhavamukhādyaiḥ saṃśritaṃ devabṛndaiḥ/
parigatamapi bhūtaiḥ pañcabhiḥ sevyamānaṃ
prakṛtimahadahaṃkāraiḥ smaredyantrarājam

iti śrīpāñcarātre tantrarahasye ahirbudhnyasaṃhitāyāṃ mahāsudarśanayantralakṣaṇaṃ nāma ṣaḍviṃśo'dhyāyaḥ
āditaḥ ślokāḥ 1565
-------------******-----------------