abhilāṣāṣṭakam · Chapter 1

kadā pakṣīndrāṃsopari gatamajaṃ kañcanayanam
ramāsaṃśliṣṭāṅgaṃ gaganarucamāpītavasanam /
gadāśaṅkhāmbhojārivaramālokya suciraṃ
gamiṣyatyetanme nanu saphalatāṃ netrayugalam

kadā kṣīrābdhyantaḥ surataruvanāntarmaṇimaye
samāsīnaṃ pīṭhe jaladhitanayāliṅgitatanum /
stutaṃ devairnityaṃ munivarakadambairabhinutam
stavaiḥ santoṣyāmi śrutivacanagarbhaiḥ suragurum

kadā māmābhītaṃ bhayajaladhitastāpasatanuṃ
gatā rāgaṃ gaṅgātaṭagiriguhāvāsasahanam /
lapantaṃ he viṣṇo suravara rameśeti satataṃ
samabhyetyodāraṃ kamalanayano vakṣyati vacaḥ

kadā me hṛdpadme bhramara iva padme prativasan
sadā dhyānābhyāsādaniśamupahūto vibhurasau /
sphurajjyotīrūpo raviriva rasāsevyacaraṇo
hariṣyatyajñānājjanitatimiraṃ tūrṇamakhilam

kadā me bhogāśā nibiḍabhavapāśāduparataṃ
tapaḥśuddhaṃ buddhaṃ guruvacanatodairacapalam /
mano maunaṃ kṛtvā haricaraṇayoścāru suciraṃ
sthitiṃ sthāṇuprāyāṃ bhavabhayaharāṃ yāsyati parām

kadā me saṃruddhākhilakaraṇajālasya parito
jitāśeṣaprāṇānilaparikarasya prajapataḥ /
sadoṅkāraṃ cittaṃ haripadasaroje dhṛtavataḥ
sameṣyatyullāsaṃ muhurakhilaromāvaliriyam

kadā prārabdhānte pariśithilatāṃ gacchati śanaiḥ
śarīre cākṣaughe'pyuparatavati prāṇapavane /
vadatyūrdhvaṃ śaśvanmama vadanakañje muhuraho
kariṣyatyāvāsaṃ haririti padaṃ pāvanatamam

kadā hitvā jīrṇāṃ tvacamiva bhujaṅgastanumimāṃ
caturbāhuścakrāmbujadarakaraḥ pītavasanaḥ /
ghanaśyāmo dūtairgaganagatinīto natiparai-
rgamiṣyāmīśasyāntikamakhiladuḥkhāntakamiti

// iti śrīmatparamahaṃsasvāmibrahmānandaviracitaṃ
abhilāṣāṣṭakaṃ sampūrṇam //