અભિલાષાષ્ટકમ્ · અધ્યાય 1

કદા પક્ષીન્દ્રાંસોપરિ ગતમજં કઞ્ચનયનમ્
રમાસંશ્લિષ્ટાઙ્ગં ગગનરુચમાપીતવસનમ્ ।
ગદાશઙ્ખામ્ભોજારિવરમાલોક્ય સુચિરં
ગમિષ્યત્યેતન્મે નનુ સફલતાં નેત્રયુગલમ્

કદા ક્ષીરાબ્ધ્યન્તઃ સુરતરુવનાન્તર્મણિમયે
સમાસીનં પીઠે જલધિતનયાલિઙ્ગિતતનુમ્ ।
સ્તુતં દેવૈર્નિત્યં મુનિવરકદમ્બૈરભિનુતમ્
સ્તવૈઃ સન્તોષ્યામિ શ્રુતિવચનગર્ભૈઃ સુરગુરુમ્

કદા મામાભીતં ભયજલધિતસ્તાપસતનું
ગતા રાગં ગઙ્ગાતટગિરિગુહાવાસસહનમ્ ।
લપન્તં હે વિષ્ણો સુરવર રમેશેતિ સતતં
સમભ્યેત્યોદારં કમલનયનો વક્ષ્યતિ વચઃ

કદા મે હૃદ્પદ્મે ભ્રમર ઇવ પદ્મે પ્રતિવસન્
સદા ધ્યાનાભ્યાસાદનિશમુપહૂતો વિભુરસૌ ।
સ્ફુરજ્જ્યોતીરૂપો રવિરિવ રસાસેવ્યચરણો
હરિષ્યત્યજ્ઞાનાજ્જનિતતિમિરં તૂર્ણમખિલમ્

કદા મે ભોગાશા નિબિડભવપાશાદુપરતં
તપઃશુદ્ધં બુદ્ધં ગુરુવચનતોદૈરચપલમ્ ।
મનો મૌનં કૃત્વા હરિચરણયોશ્ચારુ સુચિરં
સ્થિતિં સ્થાણુપ્રાયાં ભવભયહરાં યાસ્યતિ પરામ્

કદા મે સંરુદ્ધાખિલકરણજાલસ્ય પરિતો
જિતાશેષપ્રાણાનિલપરિકરસ્ય પ્રજપતઃ ।
સદોઙ્કારં ચિત્તં હરિપદસરોજે ધૃતવતઃ
સમેષ્યત્યુલ્લાસં મુહુરખિલરોમાવલિરિયમ્

કદા પ્રારબ્ધાન્તે પરિશિથિલતાં ગચ્છતિ શનૈઃ
શરીરે ચાક્ષૌઘેઽપ્યુપરતવતિ પ્રાણપવને ।
વદત્યૂર્ધ્વં શશ્વન્મમ વદનકઞ્જે મુહુરહો
કરિષ્યત્યાવાસં હરિરિતિ પદં પાવનતમમ્

કદા હિત્વા જીર્ણાં ત્વચમિવ ભુજઙ્ગસ્તનુમિમાં
ચતુર્બાહુશ્ચક્રામ્બુજદરકરઃ પીતવસનઃ ।
ઘનશ્યામો દૂતૈર્ગગનગતિનીતો નતિપરૈ-
ર્ગમિષ્યામીશસ્યાન્તિકમખિલદુઃખાન્તકમિતિ

॥ ઇતિ શ્રીમત્પરમહંસસ્વામિબ્રહ્માનન્દવિરચિતં
અભિલાષાષ્ટકં સમ્પૂર્ણમ્ ॥