Abhidharmadīpa · Verses 381-400

mātsaryaṃ daurmanasyena saumanasyena kasyacit /
dvābhyāṃ māyā tathā śāṭhyaṃ mrakṣo middhaṃ tathaiva ca

madastu sumanaḥskandhasukhābhyāṃ saṃprayujyate /
āhrīkyamanapatrāpyaṃ styānauddhatye ca pañcabhiḥ

āhrīkyamanapatrāpyaṃ styānamiddhaṃ tathoddhavaḥ

samastālambināntyena tānvettyadhruvatādibhiḥ /
kleśātyantakṣayo 'ntyena saṃbhinnālambanena vā

asaṃbhinnārtha viṣayaṃ trayametad dvidheṣyate /
tasyaivaṃ paśyataḥ sākṣādudayavyayadarśanam

skandheṣu jāyate paścāccakrabhramarikādivat /
sa pratītyasamutpādaṃ skandhānāṃ pratyavekṣate

satyeṣu pātayitvataṃ tadā kaścitparīkṣate /
tadanityatvaduḥkhatve samavetya tataḥ punaḥ

akartṛkānnirīhāṃśca pratyayādhīnasaṃbhavān /
dṛṣṭvā sarveṣvanātmeti tattvākāraṃ niṣevate

anadhiṣṭhātṛkatvaṃ ca pāratantryaṃ ca paśyataḥ /
sarvadharmeṣu nairātmye sthirā buddhiḥ pravartate

svabhāvenāviśūnyatvād dharmamudrā udāhṛtā /
taduktyā ca taduktatvācchūnyākāro na deśitaḥ

gotradvārasamūhādīn dhātvādīnāṃ yathāyatham /
svasādhāraṇacihnābhyāṃ sadatopaparīkṣate

pratiskandhaṃ tatastasya svābhāvyādiṣu tattvataḥ /
krameṇa jāyate paścātkauśalaṃ sthānasaptake

nirmathnataḥ krameṇāsya duḥkhasatyabhavāraṇim /
śraddhāvīryasahāyasya tattvajñānānalārthinaḥ

ākārapatitaṃ jñānaṃ tataḥ śamaniyāmakam /
bhāvanāmayamūṣmākhyaṃ jāyate sānuvartakam

tatastathaiva mūrdhāno mithyādṛṣṭyupaghātinaḥ /
ūṣmabhyo 'dhikasāmarthyādratnaśraddhāvivardhinaḥ

........netvasminnubhayatrāpi paścimā

bhāvyate skandhadṛktvādau na tannirvāṇadarśinaḥ /
ākārāṃstulyajātīyān sarvatrātra tu nirdiśet

draṣṭavyānyatarā tābhyaḥ pratyutpannā vivardhane /
catasṛbhyastvanyatamā pratyutpannā vivardhane

anāgatāstu bhāvyante catasro 'pyatra niścayāt /
mokṣe 'ntye saṃmukhībhūtāḥ samagrāḥ khalvanāgatāḥ

ākārāḥ khalu sarvepi bhāvyante gotralābhataḥ /
gotralābhe tu vijñeyā sabhāgākārabhāvanā