Abhidharmadīpa · Verses 161-180

vigatāvaṇe jñāne buddhoktermukhyakalpanā /
tadāśraye phale cāpi vijñeyā guṇakalpanā

śāśvatatvaśubhatvābhyāṃ sarvānarthanivṛttitaḥ /
mukhyakalpanayā tadvaddharmo nirvāṇamucyate

āryāḥ śiṣyaguṇāḥ saṃghastathaiva paramārthataḥ /
etānyo yāti śaraṇaṃ sa yāti śaraṇatrayam

mithyācāraḥ satāṃ garhyātparatrākaraṇāptitaḥ /
pāpiṣṭhatvānmṛṣāvādo madyapānaṃ smṛtikṣayātū

sarvebhyo vartamānebhyo dvividhebhyo 'pi kāmajaḥ /
trikālebhyastu maulebhyo labhyete bhāvanāmayau

sarvebhyaḥ sattvajātibhyaḥ saṃvaro vāṅgakāraṇaiḥ /
sarvebhyo saṃvarāṅgebhyaḥ sattvebhyaśca na kāraṇaiḥ

kriyayāsaṃvarapraptiḥ sa hābhyupagamena vā /
avijñaptirato 'nyasyāḥ kṣetrāṅgādiviśeṣataḥ

kāmāptasaṃvaratyāgaḥ śikṣānikṣepaṇādibhiḥ /
patanīyarapītyeke tannetyanye tvayogataḥ

ayogo nāṃśuvidhvaṃsātpaṭadravyaṃ vinaśyati /
sūtre dhvaṃsoktiranyārthā yatherṣyāśaṭhanādiṣu

saddharmāntarddhito 'nye 'nye nāpūrvāpratilambhataḥ /
bhūsaṃcāreṇa hānyā ca tyajyate dhyānajaṃ śubham

tathārūpyāptamāryantu phalāptyakṣavihānibhiḥ /
asaṃvaro damaprāptirjīvitotsarjanā dibhiḥ

cittavegādivicchedairavijñaptistu madhyamā /
kāmāptaṃ kuśalaṃ nāma tribhirmūlacchidādibhiḥ

pratipakṣodayātkliṣṭaṃ tridhātvāptaṃ vihīyate /
sarve kāmeṣu rūpe dvāveko 'rūpiṣu lābhataḥ

yadiṣṭaphaladaṃ karma kuśalaṃ tadudāhṛtam /
viparyayeṇākuśalamavyākṛtamato 'nyathā

kāmāptaṃ prathamaṃ puṇyamapuṇyamaśubhātmakam /
ūrdhvabhūmikamānejyaṃ vipākaṃ pratyanejanāt

sukhavedyaṃ śubhaṃ karma dhyānādarvākturīyakāt /
upekṣāvedyamanyatra duḥkhavedyantu pāpakam

adho 'pi madhyamaṃ karma dhyānenāntyepi nirvṛteḥ /
yugapattrivipākeṣṭerdhyānāntaravipākataḥ

punaścaturvidhaṃ karma dṛṣṭavedyādibhedataḥ /
janmanastribhirākṣepo dṛṣṭadharmāhvayādṛte

caturṇāmapi cākṣepaḥ sarvatra narakādṛte /
na tatreṣṭaphalābhāvācchubhaṃ yasmādvipacyate

notpadyavedyakṛttatra yadviraktaḥ pṛthagjanaḥ /
sthiro nāparakṛccāryaścalo 'pi bhavamūlayoḥ