108 Buddhist stotras · Chapter 106
yā samyaguktavidhibhiḥ paripathyamānā lakṣmīṃ dadāti vipulāṃ sugatopabhogān /
tāṃ dhāraṇīṃ sakalasattvahitaikacittāṃ bhaktyā namāmi satataṃ vasudhārasaṃjñām //
yā saṃsmṛtā sucirasusthataraṃ pravṛddhaṃ dāridrayaduḥkhaduritaṃ śamate narāṇām /
tāṃ kalpavṛkṣasadṛśīṃ vasudhārasaṃjñāṃ nityaṃ namāmi śirasā jagatāṃ hitāya //
ratnākarīṃ ratnanidhānakoṣāṃ vicitraratnāṃ pratibhāsavarṣām /
ratnāvalīṃ ratnamayīṃ vicitrāṃ namāmi cāryāṃ vasudhāradhārām //
tāṃ ratnapāṇisaphalāmavabhāsayā te tyāgāvataṃsadayaśekharamudvahantīm /
hārārdhahāracalakuṇḍalabhūṣitāṅgīmāryāṃ namāmi vasuvṛṣṭikarīṃ śaraṇyām //
Original text: 108 Buddhist stotras · Edition: Janardan Shastri Pandey: Bauddha stotra Samgrahah, Varanasi : Motilal Banarsidass, 1994 · Data entry members of the Digital Sanskrit Buddhist Canon Input Project · GRETIL (Göttingen) · CC BY-NC-SA 4.0