108 Buddhist stotras · अध्याय 106

या सम्यगुक्तविधिभिः परिपथ्यमाना लक्ष्मीं ददाति विपुलां सुगतोपभोगान् ।
तां धारणीं सकलसत्त्वहितैकचित्तां भक्त्या नमामि सततं वसुधारसंज्ञाम् ॥

या संस्मृता सुचिरसुस्थतरं प्रवृद्धं दारिद्रयदुःखदुरितं शमते नराणाम् ।
तां कल्पवृक्षसदृशीं वसुधारसंज्ञां नित्यं नमामि शिरसा जगतां हिताय ॥

रत्नाकरीं रत्ननिधानकोषां विचित्ररत्नां प्रतिभासवर्षाम् ।
रत्नावलीं रत्नमयीं विचित्रां नमामि चार्यां वसुधारधाराम् ॥

तां रत्नपाणिसफलामवभासया ते त्यागावतंसदयशेखरमुद्वहन्तीम् ।
हारार्धहारचलकुण्डलभूषिताङ्गीमार्यां नमामि वसुवृष्टिकरीं शरण्याम् ॥