वृत्तमालास्तुति · श्लोक 81-100

स्वेदपूरविलसत्पुलकोच्छ्वसितैस् त्रुटत् कञ्चुकं दधति निर्धुतम् अप्य् अमरस्त्रियः
कान्तिकम्रम् इव ते समिताव् अतिशक्वरी बन्धसारम् उरुकम्पम् अनङ्गविजृम्भितम् ॥

अनुपमरमणीया भङ्गिर् अङ्गेषु यस्या हरति रतिम् उदाराशेषरूपान्तरेषु
जयति तनुर् अखण्डाखण्डलेष्वासलक्ष्मी विजयपरमधामव्यामरुग् मालिनी यम् ॥

अविकलतालशालिकलकाकलीकल व्यतिकरवल्लकीवलितचारुपञ्चमा
भणति मुदा प्रतीष्टजिनभार भारती स्वमहिम कामिनी तव सभासु मद्रकम् ॥

जयति नाथ जगज्जयकुञ्जरनिश्चली करणशृङ्खलजालनिभाङ्गदभूषितः
भुजतरुस् तव दुर्गतिमार्गमहार्गलः प्रमदमन्मथनिर्मथनः सुगतप्रियः ॥

भवशिरसि महितगुणमहिमभुवं व्यपगतसकलमलशुचिम् अधिपते
तव वरविजयसमुपचितयशसः श्रियम् अनुहरति हि शरदि शशिकला ॥

पटुपरिमलमिलितमधुकरयुव भ्रमसहशितिसुगतसमुचितसुखा
विलसति तव शिरसि रसलयवती स्रग् इयम् अमरपतियुवतिविरचिता ॥

न यतिपदम् अयसि यद् अतिदयधियः प्रथयसि जगति च परहितकृतिनः
जनयति हिमचयरुचिर् इति भवतो वियद् उपहतनिज मणि गुणनिकरः ॥

अतिरतिकरकथ कथम् इव समियाद् अविरतनवनवनव तव परमैः
गुणगणपरिमितिम् उदधिषु यतिभिः सुयतिभिर् अगणित गुण मणिनिकरः ॥

जयति तव तनुर् इयम् उरुतरकरुण निखिलजगदुचितपरिभुगवनिर् इव
शिशुमतिकलितसकलजनबहुविध विमतिलडितविधिभिर् अचलध्र्तिर् इह ॥

प्रति जडधियम् इ ह समधिकगुरुदय मृदुमतिर् अपि तव शुभमयसमुदय
करतलविनिहितकुवलय कलयति जिनकुल कुवलयम् अविषमभरम् इति ॥

व्योमविकीर्णकिर्तिमदपरिमलकलना भङ्गुरतुङ्गवादिमदकलकरिनिकरं
विश्ववनोदरे ऽत्र रवयति जितजलदं नाथ दधास्य् उदारम् ऋषभगजविलसितम् ॥

कस् त्वयि बद्धवर्मणि जगद्धितधानधिया निर्विहतप्रतिज्ञ परितापकणः क्व चन
मारवधूजनस्य कमनीयकपोलतले यन् नव पत्त्रभङ्गरचना लस एव करः ॥

निरुपमरम्यरूप जिनजातदृश्वनो ऽष्टौ मदयति ते ऽधिकं विधुतशोक लोकपालान्
सदुपधिपुण्डरीकनखराजिराजितेयं विरचितपञ्चचीररुचिरा कुमारलीला ॥

गुणानाम् अत्यष्टिः कथम् इह ममेवास्तु जगताम् इति च्छन्दः स्वैरं परिणतिम् अवापत् तव तथा
यथा त्वय्य् एवास्मिन् परम रसभेदप्रणयनी समुद्भूता भूतिर् निखिलसुखशाखा शिखरिणी ॥

जयत्य् अमरमन्दिरोपलविशालरक्षःस्थलः स्थलीकमलकाननप्रतिमपादकन्दप्रभः
प्रभाकरशताधिकप्रकटतेजसालङ्कृतः कृतान्त मदमर्दनस् त्रिभवनाथ पृथ्वी धरः ॥

विमोहबहलान्धकारपटलावनद्धैर् मुधा रसातलगुहातिशायिभवसंकटेषु स्थितम्
त्वदङ्घ्रिकमलाश्रयोत्सवसुखं न चेद् आदृतं चिरस्य जिनवंशभास्कर कुमा र मा रैर् जितम् ॥

कल्पशतोपपादितमहाफलम् इव विहितं चञ्चलम् एतद् आयुर् अधिप त्वदवनतिपरैः
भूषणभव्यभावगमितं श्रितगुरुकरुणा दिग्यतिवंश पत्त्रपतितं कम् इव जलरुहः ॥

तव गुणविस्तरप्रणयपूतवचोविभवं वरद स एक एव सुमुखो मुखम् आवहति
मधुमयसामधाम यजुषा सजुषानुगतं श्रवणसुधाभिमानभव नर्क्कुटकं च विधिः ॥

त्रिभुवनसंमदप्रदजिनव्यवसायमधौ स्फुटसहकारतामहितम् ईहितम् एति तव
प्रवचनमञ्जरीस्रुतशमामृतपानमुदा भृत यतिषट्पदं कलकणत्कृति कोकिलकम् ॥

क्व चिद् अपि भवद्भीत्या भूरिप्रवादिमदद्विपोद् दलन सुगतस्वान्तक्ष्माभृद्गभीरगुहागृह
त्रिभवनवनाधीश क्रीडा रसार्णवसंयता द्रवति हरिणी वारं मारप्रचण्डमहाचमूः ॥