विष्णुस्मृति · अध्याय 86

वृषो हि भगवान् धर्मश् चतुष्पादः प्रकीर्तितः
वृणोमि तम् अहं भक्त्या स मे रक्षतु सर्वतः ॥

एतं युवानं पतिं वो ददाम्य् अनेन क्रीडन्तीश् चरत प्रियेण
मा हास्महि प्रजया मा तनूभिर् मा रधाम द्विषते सोम राजन् ॥

वृषं वत्सतरीयुक्तम् ऐशान्यां कारयेद् दिशि
होतुर् वस्त्रयुगं दद्यात् सुवर्णं कांस्यम् एव च ॥

अयस्कारस्य दातव्यं वेतनं मनसेप्सितम्
भोजनं बहुसर्पिष्कं ब्राह्मणांश् चात्र भोजयेत् ॥

उत्सृष्टो वृषभो यस्मिन् पिबत्य् अथ जलाशये
जलाशयं तत् सकलं पितॄंस् तस्योपतिस्ठति ॥

शृङ्गेणोल्लिखते भूमिं यत्र क्वचन दर्पितः
पितॄणाम् अन्नपानं तत् प्रभूतम् उपतिष्ठति ॥