सुश्रुतसंहिता · अध्याय 6.32

अथातः पूतनारतिषेधं व्याख्यास्यामः॥

यथोवाच भगवान् धन्वन्तरिः॥

कपोतवङ्कारलुको वरुणः पारिभद्रकः।
आस्फोता चैव योज्याः स्युर्बालानां परिषेचने॥

वचा वयःस्था गोलोमी हरितालं मनःशिला।
कुष्ठं सर्जरसश्चैव तैलार्थे वर्ग इष्यते॥

हितं घृतं तुगाक्षीर्यां सिद्धं मधुरकेषु च।
कुष्ठतालीशखदिरचन्दनस्यन्दने तथा॥

देवदारुवचाहिङ्गुकुष्ठं गिरिकदम्बरकः।
एला हरेणवश्चापि योज्या उद्धूपने सदा॥

गन्धनाकुलिकुम्भीके मज्जानो बदरस्य च।
कर्कटास्थि घृतं चापि धूपनं सर्षपैः सह॥

काकादनीं चित्रफलां बिम्बीं गुञ्जां च धारयेत्।
मत्स्यौदनं च कुर्वीत कृशरां पललं तथा।
शरावसंपुटे कृत्वा बलिं शून्यगृहे हरेत्॥

उच्छिष्टेनाभिषेकेण शिशोः स्नपनमिष्यते।
पूज्या च पूतना देवी बलिभिः सोपहारकैः॥

मलिनाम्बरसंवीता मलिना रूक्षमूर्धजा।
शून्यागाराश्रिता देवी दारकं पातु पूतना॥

दुर्दर्शना सुदुर्गन्धा कराला मेघकालिका।
भिन्नगाराश्रया देवी दारकं पातु पूतना॥