સુશ્રુતસંહિતા · અધ્યાય 6.32

અથાતઃ પૂતનારતિષેધં વ્યાખ્યાસ્યામઃ॥

યથોવાચ ભગવાન્ ધન્વન્તરિઃ॥

કપોતવઙ્કારલુકો વરુણઃ પારિભદ્રકઃ।
આસ્ફોતા ચૈવ યોજ્યાઃ સ્યુર્બાલાનાં પરિષેચને॥

વચા વયઃસ્થા ગોલોમી હરિતાલં મનઃશિલા।
કુષ્ઠં સર્જરસશ્ચૈવ તૈલાર્થે વર્ગ ઇષ્યતે॥

હિતં ઘૃતં તુગાક્ષીર્યાં સિદ્ધં મધુરકેષુ ચ।
કુષ્ઠતાલીશખદિરચન્દનસ્યન્દને તથા॥

દેવદારુવચાહિઙ્ગુકુષ્ઠં ગિરિકદમ્બરકઃ।
એલા હરેણવશ્ચાપિ યોજ્યા ઉદ્ધૂપને સદા॥

ગન્ધનાકુલિકુમ્ભીકે મજ્જાનો બદરસ્ય ચ।
કર્કટાસ્થિ ઘૃતં ચાપિ ધૂપનં સર્ષપૈઃ સહ॥

કાકાદનીં ચિત્રફલાં બિમ્બીં ગુઞ્જાં ચ ધારયેત્।
મત્સ્યૌદનં ચ કુર્વીત કૃશરાં પલલં તથા।
શરાવસંપુટે કૃત્વા બલિં શૂન્યગૃહે હરેત્॥

ઉચ્છિષ્ટેનાભિષેકેણ શિશોઃ સ્નપનમિષ્યતે।
પૂજ્યા ચ પૂતના દેવી બલિભિઃ સોપહારકૈઃ॥

મલિનામ્બરસંવીતા મલિના રૂક્ષમૂર્ધજા।
શૂન્યાગારાશ્રિતા દેવી દારકં પાતુ પૂતના॥

દુર્દર્શના સુદુર્ગન્ધા કરાલા મેઘકાલિકા।
ભિન્નગારાશ્રયા દેવી દારકં પાતુ પૂતના॥