शास्त्रवार्त्तासमुच्चय · अध्याय 11.3

मृत्यादिवर्जिता चेह मुक्तिः कर्मपरिक्षयात्
नाकर्मणः क्वचिज् जन्म यथोक्तं पूर्वसूरिभिः ॥

दग्धे बीजे यथात्यन्तं प्रादुर्भवति नाङ्कुरः
कर्मबीजे तथा दग्धे न रोहति भवाङ्कुरः ॥

जन्माभावे जरामृत्योर् अभावो हेत्वभावतः
तदभावे च निःशेष दुःखाभावः सदैव हि ॥

परमानन्दभावश् च तदभावे हि शाश्वतः
व्याबाधाभावसंसिद्धः सिधानां सुखम् इष्यते ॥

सर्वद्वन्द्वविनिर्मुक्ताः सर्वाबाधाविवर्जिताः
सर्वसंसिद्धसत्कार्याः सुखं तेषां किमुच्यते ॥

अमूर्ताः सर्वभावज्ञास् त्रैलोक्योपरिवर्तिनः
क्षीणसङ्गा महात्मानस् ते सदा सुखम् आसते ॥