संवित्सिद्धि · श्लोक 341-360

आनन्दस्वप्रकाशत्व नित्यत्वमहिमाद्य् अथ ॥

ब्रह्मस्वरूपम् एवेष्टं तत्रापिदं विविच्यताम् ॥

ब्रह्मेति यावन् निर्दिष्टं तन्मात्रं किं सुखादयः ॥

अथवा तस्य ते यद् वा त एव ब्रह्मसंज्ञिनः ॥

आद्ये तत्तत्पदाम्नान वैयर्थ्यं वेदलोकयोः ॥

पूर्वोक्तनीत्या भेदश् च जगज्जन्मादिकारणम् ॥

अभ्युपेत्यैव हि ब्रह्म विवादास् तेषु वादिनाम् ॥

द्वितीये सैव तैर् एव ब्रह्मणः सद्वितीयता ॥

तृतीये ब्रह्म भिद्येत तन्मात्रत्वात् पदे पदे ॥

तत्समूहो ऽथवा ब्रह्म तरुवृन्दवनादिवत् ॥

प्रकर्षश् चप्रकाशश्च भिन्नाव् एवार्कवर्तिनौ ॥

तेन न क्वापि वाक्यार्थो ऽविभागो ऽस्ति निदर्शनम् ॥

जाड्यदुःखाद्यपोहेन यद्य् एकत्रैव वर्तिता ॥

ज्ञानानन्दादिशब्दानां न सतः सद्वितीयता ॥

अपोहाः किं न सन्त्य् एव सन्तो वा नोभये ऽपि वा ॥

सत्त्वे सत् सद्वितीयं स्याज् जडाद्यात्मकतेतरे ॥

सदसद्व्यतिरेकोक्तिः पूर्वम् एव पराकृता ॥

तथात्वे च घटादिभ्यो ब्रह्मापि न विशिष्यते ॥

किं चापोह्यजडत्वादि विरुद्धार्थासमर्पणे ॥

नैव तत् तद् अपोह्येत तदेकार्थैः पदैर् इव ॥