ऋग्वेद · अध्याय 9.042

जनयन् रोचना दिवो जनयन्न् अप्सु सूर्यम् ।
वसानो गा अपो हरिः ॥

एष प्रत्नेन मन्मना देवो देवेभ्यस् परि ।
धारया पवते सुतः ॥

वावृधानाय तूर्वये पवन्ते वाजसातये ।
सोमाः सहस्रपाजसः ॥

दुहानः प्रत्नम् इत् पयः पवित्रे परि षिच्यते ।
क्रन्दन् देवाँ अजीजनत् ॥

अभि विश्वानि वार्याभि देवाँ ऋतावृधः ।
सोमः पुनानो अर्षति ॥

गोमन् नः सोम वीरवद् अश्वावद् वाजवत् सुतः ।
पवस्व बृहतीर् इषः ॥