ऋग्वेद · अध्याय 9.041

प्र ये गावो न भूर्णयस् त्वेषा अयासो अक्रमुः ।
घ्नन्तः कृष्णाम् अप त्वचम् ॥

सुवितस्य मनामहे ऽति सेतुं दुराव्यम् ।
साह्वांसो दस्युम् अव्रतम् ॥

शृण्वे वृष्टेर् इव स्वनः पवमानस्य शुष्मिणः ।
चरन्ति विद्युतो दिवि ॥

आ पवस्व महीम् इषं गोमद् इन्दो हिरण्यवत् ।
अश्वावद् वाजवत् सुतः ॥

स पवस्व विचर्षण आ मही रोदसी पृण ।
उषाः सूर्यो न रश्मिभिः ॥

परि णः शर्मयन्त्या धारया सोम विश्वतः ।
सरा रसेव विष्टपम् ॥