ऋग्वेद · अध्याय 9.036

असर्जि रथ्यो यथा पवित्रे चम्वोः सुतः ।
कार्ष्मन् वाजी न्य् अक्रमीत् ॥

स वह्निः सोम जागृविः पवस्व देववीर् अति ।
अभि कोशम् मधुश्चुतम् ॥

स नो ज्योतींषि पूर्व्य पवमान वि रोचय ।
क्रत्वे दक्षाय नो हिनु ॥

शुम्भमान ऋतायुभिर् मृज्यमानो गभस्त्योः ।
पवते वारे अव्यये ॥

स विश्वा दाशुषे वसु सोमो दिव्यानि पार्थिवा ।
पवताम् आन्तरिक्ष्या ॥

आ दिवस् पृष्ठम् अश्वयुर् गव्ययुः सोम रोहसि ।
वीरयुः शवसस् पते ॥