ઋગ્વેદ · અધ્યાય 9.036

અસર્જિ રથ્યો યથા પવિત્રે ચમ્વોઃ સુતઃ ।
કાર્ષ્મન્ વાજી ન્ય્ અક્રમીત્ ॥

સ વહ્નિઃ સોમ જાગૃવિઃ પવસ્વ દેવવીર્ અતિ ।
અભિ કોશમ્ મધુશ્ચુતમ્ ॥

સ નો જ્યોતીંષિ પૂર્વ્ય પવમાન વિ રોચય ।
ક્રત્વે દક્ષાય નો હિનુ ॥

શુમ્ભમાન ઋતાયુભિર્ મૃજ્યમાનો ગભસ્ત્યોઃ ।
પવતે વારે અવ્યયે ॥

સ વિશ્વા દાશુષે વસુ સોમો દિવ્યાનિ પાર્થિવા ।
પવતામ્ આન્તરિક્ષ્યા ॥

આ દિવસ્ પૃષ્ઠમ્ અશ્વયુર્ ગવ્યયુઃ સોમ રોહસિ ।
વીરયુઃ શવસસ્ પતે ॥