ऋग्वेद · अध्याय 9.034

प्र सुवानो धारया तनेन्दुर् हिन्वानो अर्षति ।
रुजद् दृळ्हा व्य् ओजसा ॥

सुत इन्द्राय वायवे वरुणाय मरुद्भ्यः ।
सोमो अर्षति विष्णवे ॥

वृषाणं वृषभिर् यतं सुन्वन्ति सोमम् अद्रिभिः ।
दुहन्ति शक्मना पयः ॥

भुवत् त्रितस्य मर्ज्यो भुवद् इन्द्राय मत्सरः ।
सं रूपैर् अज्यते हरिः ॥

अभीम् ऋतस्य विष्टपं दुहते पृश्निमातरः ।
चारु प्रियतमं हविः ॥

सम् एनम् अह्रुता इमा गिरो अर्षन्ति सस्रुतः ।
धेनूर् वाश्रो अवीवशत् ॥