ऋग्वेद · अध्याय 9.028

एष वाजी हितो नृभिर् विश्वविन् मनसस् पतिः ।
अव्यो वारं वि धावति ॥

एष पवित्रे अक्षरत् सोमो देवेभ्यः सुतः ।
विश्वा धामान्य् आविशन् ॥

एष देवः शुभायते ऽधि योनाव् अमर्त्यः ।
वृत्रहा देववीतमः ॥

एष वृषा कनिक्रदद् दशभिर् जामिभिर् यतः ।
अभि द्रोणानि धावति ॥

एष सूर्यम् अरोचयत् पवमानो विचर्षणिः ।
विश्वा धामानि विश्ववित् ॥

एष शुष्म्य् अदाभ्यः सोमः पुनानो अर्षति ।
देवावीर् अघशंसहा ॥