ऋग्वेद · अध्याय 9.021

एते धावन्तीन्दवः सोमा इन्द्राय घृष्वयः ।
मत्सरासः स्वर्विदः ॥

प्रवृण्वन्तो अभियुजः सुष्वये वरिवोविदः ।
स्वयं स्तोत्रे वयस्कृतः ॥

वृथा क्रीळन्त इन्दवः सधस्थम् अभ्य् एकम् इत् ।
सिन्धोर् ऊर्मा व्य् अक्षरन् ॥

एते विश्वानि वार्या पवमानास आशत ।
हिता न सप्तयो रथे ॥

आस्मिन् पिशङ्गम् इन्दवो दधाता वेनम् आदिशे ।
यो अस्मभ्यम् अरावा ॥

ऋभुर् न रथ्यं नवं दधाता केतम् आदिशे ।
शुक्राः पवध्वम् अर्णसा ॥

एत उ त्ये अवीवशन् काष्ठां वाजिनो अक्रत ।
सतः प्रासाविषुर् मतिम् ॥