ऋग्वेद · अध्याय 9.011

उपास्मै गायता नरः पवमानायेन्दवे ।
अभि देवाँ इयक्षते ॥

अभि ते मधुना पयो ऽथर्वाणो अशिश्रयुः ।
देवं देवाय देवयु ॥

स नः पवस्व शं गवे शं जनाय शम् अर्वते ।
शं राजन्न् ओषधीभ्यः ॥

बभ्रवे नु स्वतवसे ऽरुणाय दिविस्पृशे ।
सोमाय गाथम् अर्चत ॥

हस्तच्युतेभिर् अद्रिभिः सुतं सोमम् पुनीतन ।
मधाव् आ धावता मधु ॥

नमसेद् उप सीदत दध्नेद् अभि श्रीणीतन ।
इन्दुम् इन्द्रे दधातन ॥

अमित्रहा विचर्षणिः पवस्व सोम शं गवे ।
देवेभ्यो अनुकामकृत् ॥

इन्द्राय सोम पातवे मदाय परि षिच्यसे ।
मनश्चिन् मनसस् पतिः ॥

पवमान सुवीर्यं रयिं सोम रिरीहि नः ।
इन्दव् इन्द्रेण नो युजा ॥