ऋग्वेद · अध्याय 8.081

आ तू न इन्द्र क्षुमन्तं चित्रं ग्राभं सं गृभाय ।
महाहस्ती दक्षिणेन ॥

विद्मा हि त्वा तुविकूर्मिं तुविदेष्णं तुवीमघम् ।
तुविमात्रम् अवोभिः ॥

नहि त्वा शूर देवा न मर्तासो दित्सन्तम् ।
भीमं न गां वारयन्ते ॥

एतो न्व् इन्द्रं स्तवामेशानं वस्वः स्वराजम् ।
न राधसा मर्धिषन् नः ॥

प्र स्तोषद् उप गासिषच् छ्रवत् साम गीयमानम् ।
अभि राधसा जुगुरत् ॥

आ नो भर दक्षिणेनाभि सव्येन प्र मृश ।
इन्द्र मा नो वसोर् निर् भाक् ॥

उप क्रमस्वा भर धृषता धृष्णो जनानाम् ।
अदाशूष्टरस्य वेदः ॥

इन्द्र य उ नु ते अस्ति वाजो विप्रेभिः सनित्वः ।
अस्माभिः सु तं सनुहि ॥

सद्योजुवस् ते वाजा अस्मभ्यं विश्वश्चन्द्राः ।
वशैश् च मक्षू जरन्ते ॥