ऋग्वेद · अध्याय 8.080

नह्य् अ1न्यम् बळाकरम् मर्डितारं शतक्रतो ।
त्वं न इन्द्र मृळय ॥

यो नः शश्वत् पुराविथामृध्रो वाजसातये ।
स त्वं न इन्द्र मृळय ॥

किम् अङ्ग रध्रचोदनः सुन्वानस्यावितेद् असि ।
कुवित् स्व् इन्द्र णः शकः ॥

इन्द्र प्र णो रथम् अव पश्चाच् चित् सन्तम् अद्रिवः ।
पुरस्ताद् एनम् मे कृधि ॥

हन्तो नु किम् आससे प्रथमं नो रथं कृधि ।
उपमं वाजयु श्रवः ॥

अवा नो वाजयुं रथं सुकरं ते किम् इत् परि ।
अस्मान् सु जिग्युषस् कृधि ॥

इन्द्र दृह्यस्व पूर् असि भद्रा त एति निष्कृतम् ।
इयं धीर् ऋत्वियावती ॥

मा सीम् अवद्य आ भाग् उर्वी काष्ठा हितं धनम् ।
अपावृक्ता अरत्नयः ॥

तुरीयं नाम यज्ञियं यदा करस् तद् उश्मसि ।
आद् इत् पतिर् न ओहसे ॥

अवीवृधद् वो अमृता अमन्दीद् एकद्यूर् देवा उत याश् च देवीः ।
तस्मा उ राधः कृणुत प्रशस्तम् प्रातर् मक्षू धियावसुर् जगम्यात् ॥