ऋग्वेद · अध्याय 8.082

आ प्र द्रव परावतो ऽर्वावतश् च वृत्रहन् ।
मध्वः प्रति प्रभर्मणि ॥

तीव्राः सोमास आ गहि सुतासो मादयिष्णवः ।
पिबा दधृग् यथोचिषे ॥

इषा मन्दस्वाद् उ ते ऽरं वराय मन्यवे ।
भुवत् त इन्द्र शं हृदे ॥

आ त्व् अशत्रव् आ गहि न्य् उ1क्थानि च हूयसे ।
उपमे रोचने दिवः ॥

तुभ्यायम् अद्रिभिः सुतो गोभिः श्रीतो मदाय कम् ।
प्र सोम इन्द्र हूयते ॥

इन्द्र श्रुधि सु मे हवम् अस्मे सुतस्य गोमतः ।
वि पीतिं तृप्तिम् अश्नुहि ॥

य इन्द्र चमसेष्व् आ सोमश् चमूषु ते सुतः ।
पिबेद् अस्य त्वम् ईशिषे ॥

यो अप्सु चन्द्रमा इव सोमश् चमूषु ददृशे ।
पिबेद् अस्य त्वम् ईशिषे ॥

यं ते श्येनः पदाभरत् तिरो रजांस्य् अस्पृतम् ।
पिबेद् अस्य त्वम् ईशिषे ॥