ઋગ્વેદ · અધ્યાય 8.081

આ તૂ ન ઇન્દ્ર ક્ષુમન્તં ચિત્રં ગ્રાભં સં ગૃભાય ।
મહાહસ્તી દક્ષિણેન ॥

વિદ્મા હિ ત્વા તુવિકૂર્મિં તુવિદેષ્ણં તુવીમઘમ્ ।
તુવિમાત્રમ્ અવોભિઃ ॥

નહિ ત્વા શૂર દેવા ન મર્તાસો દિત્સન્તમ્ ।
ભીમં ન ગાં વારયન્તે ॥

એતો ન્વ્ ઇન્દ્રં સ્તવામેશાનં વસ્વઃ સ્વરાજમ્ ।
ન રાધસા મર્ધિષન્ નઃ ॥

પ્ર સ્તોષદ્ ઉપ ગાસિષચ્ છ્રવત્ સામ ગીયમાનમ્ ।
અભિ રાધસા જુગુરત્ ॥

આ નો ભર દક્ષિણેનાભિ સવ્યેન પ્ર મૃશ ।
ઇન્દ્ર મા નો વસોર્ નિર્ ભાક્ ॥

ઉપ ક્રમસ્વા ભર ધૃષતા ધૃષ્ણો જનાનામ્ ।
અદાશૂષ્ટરસ્ય વેદઃ ॥

ઇન્દ્ર ય ઉ નુ તે અસ્તિ વાજો વિપ્રેભિઃ સનિત્વઃ ।
અસ્માભિઃ સુ તં સનુહિ ॥

સદ્યોજુવસ્ તે વાજા અસ્મભ્યં વિશ્વશ્ચન્દ્રાઃ ।
વશૈશ્ ચ મક્ષૂ જરન્તે ॥