ઋગ્વેદ · અધ્યાય 8.080

નહ્ય્ અ1ન્યમ્ બળાકરમ્ મર્ડિતારં શતક્રતો ।
ત્વં ન ઇન્દ્ર મૃળય ॥

યો નઃ શશ્વત્ પુરાવિથામૃધ્રો વાજસાતયે ।
સ ત્વં ન ઇન્દ્ર મૃળય ॥

કિમ્ અઙ્ગ રધ્રચોદનઃ સુન્વાનસ્યાવિતેદ્ અસિ ।
કુવિત્ સ્વ્ ઇન્દ્ર ણઃ શકઃ ॥

ઇન્દ્ર પ્ર ણો રથમ્ અવ પશ્ચાચ્ ચિત્ સન્તમ્ અદ્રિવઃ ।
પુરસ્તાદ્ એનમ્ મે કૃધિ ॥

હન્તો નુ કિમ્ આસસે પ્રથમં નો રથં કૃધિ ।
ઉપમં વાજયુ શ્રવઃ ॥

અવા નો વાજયું રથં સુકરં તે કિમ્ ઇત્ પરિ ।
અસ્માન્ સુ જિગ્યુષસ્ કૃધિ ॥

ઇન્દ્ર દૃહ્યસ્વ પૂર્ અસિ ભદ્રા ત એતિ નિષ્કૃતમ્ ।
ઇયં ધીર્ ઋત્વિયાવતી ॥

મા સીમ્ અવદ્ય આ ભાગ્ ઉર્વી કાષ્ઠા હિતં ધનમ્ ।
અપાવૃક્તા અરત્નયઃ ॥

તુરીયં નામ યજ્ઞિયં યદા કરસ્ તદ્ ઉશ્મસિ ।
આદ્ ઇત્ પતિર્ ન ઓહસે ॥

અવીવૃધદ્ વો અમૃતા અમન્દીદ્ એકદ્યૂર્ દેવા ઉત યાશ્ ચ દેવીઃ ।
તસ્મા ઉ રાધઃ કૃણુત પ્રશસ્તમ્ પ્રાતર્ મક્ષૂ ધિયાવસુર્ જગમ્યાત્ ॥