ऋग्वेद · अध्याय 7.049

समुद्रज्येष्ठाः सलिलस्य मध्यात् पुनाना यन्त्य् अनिविशमानाः ।
इन्द्रो या वज्री वृषभो रराद ता आपो देवीर् इह माम् अवन्तु ॥

या आपो दिव्या उत वा स्रवन्ति खनित्रिमा उत वा याः स्वयंजाः ।
समुद्रार्था याः शुचयः पावकास् ता आपो देवीर् इह माम् अवन्तु ॥

यासां राजा वरुणो याति मध्ये सत्यानृते अवपश्यञ् जनानाम् ।
मधुश्चुतः शुचयो याः पावकास् ता आपो देवीर् इह माम् अवन्तु ॥

यासु राजा वरुणो यासु सोमो विश्वे देवा यासूर्जम् मदन्ति ।
वैश्वानरो यास्व् अग्निः प्रविष्टस् ता आपो देवीर् इह माम् अवन्तु ॥