ऋग्वेद · अध्याय 7.048

ऋभुक्षणो वाजा मादयध्वम् अस्मे नरो मघवानः सुतस्य ।
आ वो ऽर्वाचः क्रतवो न यातां विभ्वो रथं नर्यं वर्तयन्तु ॥

ऋभुर् ऋभुभिर् अभि वः स्याम विभ्वो विभुभिः शवसा शवांसि ।
वाजो अस्माँ अवतु वाजसाताव् इन्द्रेण युजा तरुषेम वृत्रम् ॥

ते चिद् धि पूर्वीर् अभि सन्ति शासा विश्वाँ अर्य उपरताति वन्वन् ।
इन्द्रो विभ्वाँ ऋभुक्षा वाजो अर्यः शत्रोर् मिथत्या कृणवन् वि नृम्णम् ॥

नू देवासो वरिवः कर्तना नो भूत नो विश्वे ऽवसे सजोषाः ।
सम् अस्मे इषं वसवो ददीरन् यूयम् पात स्वस्तिभिः सदा नः ॥