ઋગ્વેદ · અધ્યાય 7.049

સમુદ્રજ્યેષ્ઠાઃ સલિલસ્ય મધ્યાત્ પુનાના યન્ત્ય્ અનિવિશમાનાઃ ।
ઇન્દ્રો યા વજ્રી વૃષભો રરાદ તા આપો દેવીર્ ઇહ મામ્ અવન્તુ ॥

યા આપો દિવ્યા ઉત વા સ્રવન્તિ ખનિત્રિમા ઉત વા યાઃ સ્વયંજાઃ ।
સમુદ્રાર્થા યાઃ શુચયઃ પાવકાસ્ તા આપો દેવીર્ ઇહ મામ્ અવન્તુ ॥

યાસાં રાજા વરુણો યાતિ મધ્યે સત્યાનૃતે અવપશ્યઞ્ જનાનામ્ ।
મધુશ્ચુતઃ શુચયો યાઃ પાવકાસ્ તા આપો દેવીર્ ઇહ મામ્ અવન્તુ ॥

યાસુ રાજા વરુણો યાસુ સોમો વિશ્વે દેવા યાસૂર્જમ્ મદન્તિ ।
વૈશ્વાનરો યાસ્વ્ અગ્નિઃ પ્રવિષ્ટસ્ તા આપો દેવીર્ ઇહ મામ્ અવન્તુ ॥