ऋग्वेद · अध्याय 6.056

य एनम् आदिदेशति करम्भाद् इति पूषणम् ।
न तेन देव आदिशे ॥

उत घा स रथीतमः सख्या सत्पतिर् युजा ।
इन्द्रो वृत्राणि जिघ्नते ॥

उतादः परुषे गवि सूरश् चक्रं हिरण्ययम् ।
न्य् ऐरयद् रथीतमः ॥

यद् अद्य त्वा पुरुष्टुत ब्रवाम दस्र मन्तुमः ।
तत् सु नो मन्म साधय ॥

इमं च नो गवेषणं सातये सीषधो गणम् ।
आरात् पूषन्न् असि श्रुतः ॥

आ ते स्वस्तिम् ईमह आरेअघाम् उपावसुम् ।
अद्या च सर्वतातये श्वश् च सर्वतातये ॥