ऋग्वेद · अध्याय 5.013

अर्चन्तस् त्वा हवामहे ऽर्चन्तः सम् इधीमहि ।
अग्ने अर्चन्त ऊतये ॥

अग्नेः स्तोमम् मनामहे सिध्रम् अद्य दिविस्पृशः ।
देवस्य द्रविणस्यवः ॥

अग्निर् जुषत नो गिरो होता यो मानुषेष्व् आ ।
स यक्षद् दैव्यं जनम् ॥

त्वम् अग्ने सप्रथा असि जुष्टो होता वरेण्यः ।
त्वया यज्ञं वि तन्वते ॥

त्वाम् अग्ने वाजसातमं विप्रा वर्धन्ति सुष्टुतम् ।
स नो रास्व सुवीर्यम् ॥

अग्ने नेमिर् अराँ इव देवाँस् त्वम् परिभूर् असि ।
आ राधश् चित्रम् ऋञ्जसे ॥