ऋग्वेद · अध्याय 4.052

प्रति ष्या सूनरी जनी व्युच्छन्ती परि स्वसुः ।
दिवो अदर्शि दुहिता ॥

अश्वेव चित्रारुषी माता गवाम् ऋतावरी ।
सखाभूद् अश्विनोर् उषाः ॥

उत सखास्य् अश्विनोर् उत माता गवाम् असि ।
उतोषो वस्व ईशिषे ॥

यावयद्द्वेषसं त्वा चिकित्वित् सूनृतावरि ।
प्रति स्तोमैर् अभुत्स्महि ॥

प्रति भद्रा अदृक्षत गवां सर्गा न रश्मयः ।
ओषा अप्रा उरु ज्रयः ॥

आपप्रुषी विभावरि व्य् आवर् ज्योतिषा तमः ।
उषो अनु स्वधाम् अव ॥

आ द्यां तनोषि रश्मिभिर् आन्तरिक्षम् उरु प्रियम् ।
उषः शुक्रेण शोचिषा ॥