ऋग्वेद · अध्याय 3.042

उप नः सुतम् आ गहि सोमम् इन्द्र गवाशिरम् ।
हरिभ्यां यस् ते अस्मयुः ॥

तम् इन्द्र मदम् आ गहि बर्हिःष्ठां ग्रावभिः सुतम् ।
कुविन् न्व् अस्य तृप्णवः ॥

इन्द्रम् इत्था गिरो ममाच्छागुर् इषिता इतः ।
आवृते सोमपीतये ॥

इन्द्रं सोमस्य पीतये स्तोमैर् इह हवामहे ।
उक्थेभिः कुविद् आगमत् ॥

इन्द्र सोमाः सुता इमे तान् दधिष्व शतक्रतो ।
जठरे वाजिनीवसो ॥

विद्मा हि त्वा धनंजयं वाजेषु दधृषं कवे ।
अधा ते सुम्नम् ईमहे ॥

इमम् इन्द्र गवाशिरं यवाशिरं च नः पिब ।
आगत्या वृषभिः सुतम् ॥

तुभ्येद् इन्द्र स्व ओक्ये3 सोमं चोदामि पीतये ।
एष रारन्तु ते हृदि ॥

त्वां सुतस्य पीतये प्रत्नम् इन्द्र हवामहे ।
कुशिकासो अवस्यवः ॥