ऋग्वेद · अध्याय 3.037

वार्त्रहत्याय शवसे पृतनाषाह्याय च ।
इन्द्र त्वा वर्तयामसि ॥

अर्वाचीनं सु ते मन उत चक्षुः शतक्रतो ।
इन्द्र कृण्वन्तु वाघतः ॥

नामानि ते शतक्रतो विश्वाभिर् गीर्भिर् ईमहे ।
इन्द्राभिमातिषाह्ये ॥

पुरुष्टुतस्य धामभिः शतेन महयामसि ।
इन्द्रस्य चर्षणीधृतः ॥

इन्द्रं वृत्राय हन्तवे पुरुहूतम् उप ब्रुवे ।
भरेषु वाजसातये ॥

वाजेषु सासहिर् भव त्वाम् ईमहे शतक्रतो ।
इन्द्र वृत्राय हन्तवे ॥

द्युम्नेषु पृतनाज्ये पृत्सुतूर्षु श्रवःसु च ।
इन्द्र साक्ष्वाभिमातिषु ॥

शुष्मिन्तमं न ऊतये द्युम्निनम् पाहि जागृविम् ।
इन्द्र सोमं शतक्रतो ॥

इन्द्रियाणि शतक्रतो या ते जनेषु पञ्चसु ।
इन्द्र तानि त आ वृणे ॥

अगन्न् इन्द्र श्रवो बृहद् द्युम्नं दधिष्व दुष्टरम् ।
उत् ते शुष्मं तिरामसि ॥

अर्वावतो न आ गह्य् अथो शक्र परावतः ।
उ लोको यस् ते अद्रिव इन्द्रेह तत आ गहि ॥