ऋग्वेद · अध्याय 2.008

वाजयन्न् इव नू रथान् योगाँ अग्नेर् उप स्तुहि ।
यशस्तमस्य मीळ्हुषः ॥

यः सुनीथो ददाशुषे ऽजुर्यो जरयन्न् अरिम् ।
चारुप्रतीक आहुतः ॥

य उ श्रिया दमेष्व् आ दोषोषसि प्रशस्यते ।
यस्य व्रतं न मीयते ॥

आ यः स्व1र् ण भानुना चित्रो विभात्य् अर्चिषा ।
अञ्जानो अजरैर् अभि ॥

अत्रिम् अनु स्वराज्यम् अग्निम् उक्थानि वावृधुः ।
विश्वा अधि श्रियो दधे ॥

अग्नेर् इन्द्रस्य सोमस्य देवानाम् ऊतिभिर् वयम् ।
अरिष्यन्तः सचेमह्य् अभि ष्याम पृतन्यतः ॥