ऋग्वेद · अध्याय 10.150

समिद्धश् चित् सम् इध्यसे देवेभ्यो हव्यवाहन ।
आदित्यै रुद्रैर् वसुभिर् न आ गहि मृळीकाय न आ गहि ॥

इमं यज्ञम् इदं वचो जुजुषाण उपागहि ।
मर्तासस् त्वा समिधान हवामहे मृळीकाय हवामहे ॥

त्वाम् उ जातवेदसं विश्ववारं गृणे धिया ।
अग्ने देवाँ आ वह नः प्रियव्रतान् मृळीकाय प्रियव्रतान् ॥

अग्निर् देवो देवानाम् अभवत् पुरोहितो ऽग्निम् मनुष्या3 ऋषयः सम् ईधिरे ।
अग्निम् महो धनसाताव् अहं हुवे मृळीकं धनसातये ॥

अग्निर् अत्रिम् भरद्वाजं गविष्ठिरम् प्रावन् नः कण्वं त्रसदस्युम् आहवे ।
अग्निं वसिष्ठो हवते पुरोहितो मृळीकाय पुरोहितः ॥