ऋग्वेद · अध्याय 10.013

युजे वाम् ब्रह्म पूर्व्यं नमोभिर् वि श्लोक एतु पथ्येव सूरेः ।
शृण्वन्तु विश्वे अमृतस्य पुत्रा आ ये धामानि दिव्यानि तस्थुः ॥

यमे इव यतमाने यद् ऐतम् प्र वाम् भरन् मानुषा देवयन्तः ।
आ सीदतं स्वम् उ लोकं विदाने स्वासस्थे भवतम् इन्दवे नः ॥

पञ्च पदानि रुपो अन्व् अरोहं चतुष्पदीम् अन्व् एमि व्रतेन ।
अक्षरेण प्रति मिम एताम् ऋतस्य नाभाव् अधि सम् पुनामि ॥

देवेभ्यः कम् अवृणीत मृत्युम् प्रजायै कम् अमृतं नावृणीत ।
बृहस्पतिं यज्ञम् अकृण्वत ऋषिम् प्रियां यमस् तन्व1म् प्रारिरेचीत् ॥

सप्त क्षरन्ति शिशवे मरुत्वते पित्रे पुत्रासो अप्य् अवीवतन्न् ऋतम् ।
उभे इद् अस्योभयस्य राजत उभे यतेते उभयस्य पुष्यतः ॥