ऋग्वेद · अध्याय 1.069

शुक्रः शुशुक्वाँ उषो न जारः पप्रा समीची दिवो न ज्योतिः ॥

परि प्रजातः क्रत्वा बभूथ भुवो देवानाम् पिता पुत्रः सन् ॥

वेधा अदृप्तो अग्निर् विजानन्न् ऊधर् न गोनां स्वाद्मा पितूनाम् ॥

जने न शेव आहूर्यः सन् मध्ये निषत्तो रण्वो दुरोणे ॥

पुत्रो न जातो रण्वो दुरोणे वाजी न प्रीतो विशो वि तारीत् ॥

विशो यद् अह्वे नृभिः सनीळा अग्निर् देवत्वा विश्वान्य् अश्याः ॥

नकिष् ट एता व्रता मिनन्ति नृभ्यो यद् एभ्यः श्रुष्टिं चकर्थ ॥

तत् तु ते दंसो यद् अहन् समानैर् नृभिर् यद् युक्तो विवे रपांसि ॥

उषो न जारो विभावोस्रः संज्ञातरूपश् चिकेतद् अस्मै ॥

त्मना वहन्तो दुरो व्य् ऋण्वन् नवन्त विश्वे स्व1र् दृशीके ॥