रत्नावलीनाटिका · अध्याय 3

मदनिका । आकाशे । कोसम्बिए । अवि दिट्ठा तए भट्टिणीसआसे कञ्चणमाला ण वा । आकर्ण्य । किं भणासि । को वि कालो ताए आअच्छिअ गदाए त्ति । ता कहिं दाणिं पेक्खिस्सं । अग्रतो ऽवलोक्य । एसा खु कञ्चणमाला इदो ज्जेव्व आअच्छदि । ता जाव उवसप्पामि ।
ततः प्रविअति काञ्चनमाला ।

काञ्चनमाला । सोत्प्रासम् । साहु रे वसन्तअ साहु । अदिसैदो तए अमच्चजोअन्धराअणओ इमाए संधिविग्गहचिन्ताए ।

मदनिका । उपसृत्य सस्मितम् । हला कञ्चणमाले । किं अज्जवसन्तएण कदं जेण सो एव्वं सलाहीअदि ।

काञ्चनमाला । हला मअणिए । किं तुह एदिणा पुच्छिदेण पओअणं । ण तुमं इमं रहस्सं रक्खिदुं पारेसि ।

मदनिका । सवामि देवीए चरणेहिं जै कस्स वि पुरदो पआसेमि ।

काञ्चनमाला । जै एव्वं ता सुणं । अज्ज क्खु मए राऔलादो पडिणिवत्तन्तीए चित्तसालिआदुवारे अज्जवसन्तअस्स सुसंगदाए समं आलावो सुदो ।

मदनिका । सकौतुकं । सहि । कीदिसो ।

काञ्चनमाला । जधा । सुसंगदे । ण क्खु साअरिअं वज्जिअ पिअवअस्सस्स किं पि अस्सत्थदाए कारणं । ता चिन्तेहि एत्थ पडिआरं ति ।

मदनिका । तदो सुसंगदाए किं भणिदं ।

काञ्चनमाला । एव्वं भणिदं । अज्ज क्खु देवीए चित्तफलअवुत्तन्तसङ्किदाए साअरिअं रक्खिदुं मम हत्थे समप्पअन्तीए जं णेवत्थं मे पसादीकिदं तेण ज्जेव्व विरैददेवीवेसं साअरिअं गेण्हिअ अहं पि कञ्चणमालावेसधारिणी भविअ पदीसे इध आगमिस्सं । तुमं पि चित्तसालिआदुवारे मं पडिवालैस्ससि । तदो माहवीलदामण्डवे ताए सह भट्टिणो संगमो भविस्सदि त्ति ।

मदनिका । हदासा तुमं सुसंगदे जा एव्वं परिअणवच्छलं देविं वञ्चेसि ।

काञ्चनमाला । हला । तुमं दाणिं कहिं पत्थिदा ।

मदनिका । अस्सत्थसरीरस्स भट्टिणो कुसलवुत्तन्तं जाणिदुं गदा तुमं चिरअसि त्ति उत्तम्मन्तीए देवीए पेसिद म्हि ।

काञ्चनमाला । अदिउज्जुआ दाणिं देवी जा एव्वं पत्तिआअदि । परिक्रम्यावलोक्य च । एसो क्खु भट्टा अस्सत्थदामिसेण अत्तणो मअणावत्थं पच्छादअन्तो दन्ततोरणवडभीए उवविट्ठो चिट्ठदि । ता एहि । एदं वुत्तन्तं भट्टिणीए णिवेदेम्ह ।
इति निष्क्रान्ते ।
इति प्रवेशकः ।
(अच्त् इव्)
ततः प्रविशति गृहीतरत्नमाला सुसंगता ।