રત્નાવલીનાટિકા · અધ્યાય 3

મદનિકા । આકાશે । કોસમ્બિએ । અવિ દિટ્ઠા તએ ભટ્ટિણીસઆસે કઞ્ચણમાલા ણ વા । આકર્ણ્ય । કિં ભણાસિ । કો વિ કાલો તાએ આઅચ્છિઅ ગદાએ ત્તિ । તા કહિં દાણિં પેક્ખિસ્સં । અગ્રતો ઽવલોક્ય । એસા ખુ કઞ્ચણમાલા ઇદો જ્જેવ્વ આઅચ્છદિ । તા જાવ ઉવસપ્પામિ ।
તતઃ પ્રવિઅતિ કાઞ્ચનમાલા ।

કાઞ્ચનમાલા । સોત્પ્રાસમ્ । સાહુ રે વસન્તઅ સાહુ । અદિસૈદો તએ અમચ્ચજોઅન્ધરાઅણઓ ઇમાએ સંધિવિગ્ગહચિન્તાએ ।

મદનિકા । ઉપસૃત્ય સસ્મિતમ્ । હલા કઞ્ચણમાલે । કિં અજ્જવસન્તએણ કદં જેણ સો એવ્વં સલાહીઅદિ ।

કાઞ્ચનમાલા । હલા મઅણિએ । કિં તુહ એદિણા પુચ્છિદેણ પઓઅણં । ણ તુમં ઇમં રહસ્સં રક્ખિદું પારેસિ ।

મદનિકા । સવામિ દેવીએ ચરણેહિં જૈ કસ્સ વિ પુરદો પઆસેમિ ।

કાઞ્ચનમાલા । જૈ એવ્વં તા સુણં । અજ્જ ક્ખુ મએ રાઔલાદો પડિણિવત્તન્તીએ ચિત્તસાલિઆદુવારે અજ્જવસન્તઅસ્સ સુસંગદાએ સમં આલાવો સુદો ।

મદનિકા । સકૌતુકં । સહિ । કીદિસો ।

કાઞ્ચનમાલા । જધા । સુસંગદે । ણ ક્ખુ સાઅરિઅં વજ્જિઅ પિઅવઅસ્સસ્સ કિં પિ અસ્સત્થદાએ કારણં । તા ચિન્તેહિ એત્થ પડિઆરં તિ ।

મદનિકા । તદો સુસંગદાએ કિં ભણિદં ।

કાઞ્ચનમાલા । એવ્વં ભણિદં । અજ્જ ક્ખુ દેવીએ ચિત્તફલઅવુત્તન્તસઙ્કિદાએ સાઅરિઅં રક્ખિદું મમ હત્થે સમપ્પઅન્તીએ જં ણેવત્થં મે પસાદીકિદં તેણ જ્જેવ્વ વિરૈદદેવીવેસં સાઅરિઅં ગેણ્હિઅ અહં પિ કઞ્ચણમાલાવેસધારિણી ભવિઅ પદીસે ઇધ આગમિસ્સં । તુમં પિ ચિત્તસાલિઆદુવારે મં પડિવાલૈસ્સસિ । તદો માહવીલદામણ્ડવે તાએ સહ ભટ્ટિણો સંગમો ભવિસ્સદિ ત્તિ ।

મદનિકા । હદાસા તુમં સુસંગદે જા એવ્વં પરિઅણવચ્છલં દેવિં વઞ્ચેસિ ।

કાઞ્ચનમાલા । હલા । તુમં દાણિં કહિં પત્થિદા ।

મદનિકા । અસ્સત્થસરીરસ્સ ભટ્ટિણો કુસલવુત્તન્તં જાણિદું ગદા તુમં ચિરઅસિ ત્તિ ઉત્તમ્મન્તીએ દેવીએ પેસિદ મ્હિ ।

કાઞ્ચનમાલા । અદિઉજ્જુઆ દાણિં દેવી જા એવ્વં પત્તિઆઅદિ । પરિક્રમ્યાવલોક્ય ચ । એસો ક્ખુ ભટ્ટા અસ્સત્થદામિસેણ અત્તણો મઅણાવત્થં પચ્છાદઅન્તો દન્તતોરણવડભીએ ઉવવિટ્ઠો ચિટ્ઠદિ । તા એહિ । એદં વુત્તન્તં ભટ્ટિણીએ ણિવેદેમ્હ ।
ઇતિ નિષ્ક્રાન્તે ।
ઇતિ પ્રવેશકઃ ।
(અચ્ત્ ઇવ્)
તતઃ પ્રવિશતિ ગૃહીતરત્નમાલા સુસંગતા ।