पाशुपतसूत्र · अध्याय 1

अथातः पशुपतेः पाशुपतं योगविधिं व्याख्यास्यामः ॥

भस्मना त्रिषवणं स्नायीत ॥

भस्मनि शयीत ॥

अनुस्नानं ॥

निर्माल्यं ॥

लिङ्गधारी ॥

आयतनवासी ॥

हसितगीतनृत्तदुंदुंकारनमस्कारजप्योपहारेणोपतिष्ठेत् ॥

महादेवस्य दक्षिणामूर्तेः ॥

एकवासाः ॥

अवासा वा ॥

मूत्रपुरीषं नावेक्षेत् ॥

स्त्रीशूद्रं नाभिभाषेत् ॥

यद्य् अवेक्षेद् यद्य् अभिभाषेत् ॥

उपस्पृश्य ॥

प्राणायामं कृत्वा ॥

रौद्रीं गायत्रीं बहुरूपीं वा जपेत् ॥

अकलुषमतेः ॥

चरतः ॥

ततो ऽस्य योगः प्रवर्तते ॥

दूरदर्शनश्रवणमननविज्ञानानि चास्य प्रवर्तन्ते ॥

सर्वज्ञाता ॥

मनोजवित्वम् ॥

कामरूपित्वम् ॥

विकरणः ॥

धर्मित्वं च ॥

सर्वे चास्य वश्या भवन्ति ॥

सर्वेषां चावश्यो भवति ॥

सर्वांश् चाविशति ॥

सर्वेषां चानावेश्यो भवति ॥

सर्वे चास्य वध्या भवन्ति ॥

सर्वेषां चावध्यो भवति ॥

अभीतः ॥

अक्षयः ॥

अजरः ॥

अमरः ॥

सर्वत्र चाप्रतिहतगतिर् भवति ॥

इत्य् एतैर् गुणयुक्तो [गुणैर् युक्तो] भगवतो महादेवस्य महागणपतिर् भवति ॥

अत्रेदं ब्रह्म जपेत् ॥

सद्योजातं प्रपद्यामि ॥

सद्योजाताय वै नमः ॥

भवे भवे नातिभवे ॥

भजस्व माम् ॥

भवोद्भवः ॥