पैप्पलाद-संहिता · अध्याय 4.18

व्रातम् अहम् अपक्ष्णानां
व्रातं मुण्डीयसाम् उत ।
व्रातं मुण्डिव्लानाम् अहं
प्र ध्वाङ्क्षाँ इव चातये ॥

प्रवक्ता प्रमादयिता
निद्रा तन्द्रीस् तृतीयकः ।
ताञ् जङ्गिडस्याग्निना
सर्वान् प्रति दहामसि॥

अशुद्धान् नः परि पाहि
रक्षोभ्य उत जङ्गिड ।
यातुधानात् किमीदिनस्
तस्मान् नः पाहि जङ्गिड ॥

अप्सराभ्यो गन्धर्वेभ्यो
देवेभ्यो असुरेभ्यः ।
अथो सर्वस्मात् पाप्मनस्
तस्मान् नः पाहि जङ्गिड ॥

नि ते शत्रून् दहति देवो अग्निर्
निर् अरातिम् अमतिं यातुधानान् ।
आ याहि शत्रून् दुरितापघ्नञ्
छतान् नो यक्ष्मेभ्यः परि पाहि जङ्गिड ॥

अकर्माग्निम् अधिपाम् अस्य देवम्
अन्वारप्स्व सहसा दैव्येन ।
सहस्वान् नः सहसा पातु जङ्गिडो
यथा जयेम पृतनाज्येषु ॥

सत्यो अग्निः सत्या आपः
सत्ये मे द्यावापृथिवी विश्वशंभुवौ ।
सत्यम् इदं ब्रह्मास्माकं कृतम् अस्तु
यम् अबध्नाद् उशनेन्द्राय
तं ते बध्नामि जङ्गिडम् ॥