પૈપ્પલાદ-સંહિતા · અધ્યાય 4.18

વ્રાતમ્ અહમ્ અપક્ષ્ણાનાં
વ્રાતં મુણ્ડીયસામ્ ઉત ।
વ્રાતં મુણ્ડિવ્લાનામ્ અહં
પ્ર ધ્વાઙ્ક્ષાઁ ઇવ ચાતયે ॥

પ્રવક્તા પ્રમાદયિતા
નિદ્રા તન્દ્રીસ્ તૃતીયકઃ ।
તાઞ્ જઙ્ગિડસ્યાગ્નિના
સર્વાન્ પ્રતિ દહામસિ॥

અશુદ્ધાન્ નઃ પરિ પાહિ
રક્ષોભ્ય ઉત જઙ્ગિડ ।
યાતુધાનાત્ કિમીદિનસ્
તસ્માન્ નઃ પાહિ જઙ્ગિડ ॥

અપ્સરાભ્યો ગન્ધર્વેભ્યો
દેવેભ્યો અસુરેભ્યઃ ।
અથો સર્વસ્માત્ પાપ્મનસ્
તસ્માન્ નઃ પાહિ જઙ્ગિડ ॥

નિ તે શત્રૂન્ દહતિ દેવો અગ્નિર્
નિર્ અરાતિમ્ અમતિં યાતુધાનાન્ ।
આ યાહિ શત્રૂન્ દુરિતાપઘ્નઞ્
છતાન્ નો યક્ષ્મેભ્યઃ પરિ પાહિ જઙ્ગિડ ॥

અકર્માગ્નિમ્ અધિપામ્ અસ્ય દેવમ્
અન્વારપ્સ્વ સહસા દૈવ્યેન ।
સહસ્વાન્ નઃ સહસા પાતુ જઙ્ગિડો
યથા જયેમ પૃતનાજ્યેષુ ॥

સત્યો અગ્નિઃ સત્યા આપઃ
સત્યે મે દ્યાવાપૃથિવી વિશ્વશંભુવૌ ।
સત્યમ્ ઇદં બ્રહ્માસ્માકં કૃતમ્ અસ્તુ
યમ્ અબધ્નાદ્ ઉશનેન્દ્રાય
તં તે બધ્નામિ જઙ્ગિડમ્ ॥