पैप्पलाद-संहिता · अध्याय 15.14

यज्ञं ब्रूमो यजमानम्
ऋचः सामानि भेषजा ।
यजूंषि होत्रान् ब्रूमस्
ते नो मुञ्चन्त्व् अंहसः ॥

ऋतून् ब्रूम ऋतुपतीन्
आर्तवाँ उत हायनान् ।
समाः संवत्सरान् मासस्
ते नो (…) ॥

दिवं ब्रूमो नक्षत्राणि
भूमिं यक्षाणि पर्वतान् ।
समुद्रा नद्यो वेशन्तास्
ते (…) ॥

सप्त ऋषीन् वा इदं ब्रूमो
ऽपो देवीः प्रजापतिम् ।
पितॄन् यमश्रेष्ठान् ब्रूमस्
ते (…) ॥

विश्वान् देवान् इदं ब्रूमः
सत्यसन्धान् ऋतावृधः ।
विश्वाभिः पत्नीभिः साकं
ते (…) ॥

आदित्या रुद्रा वसवो
देवा दैवा अथर्वणः ।
अङ्गिरसो मनीषिणस्
ते (…) ॥

ये देवा दिविषदो
ऽन्तरिक्षसदश् च ये ।
पृथिव्यां शक्रा ये श्रितास्
ते (…) ॥

एत देवा दक्षिणतः
पश्वात् प्राञ्च उद् एतन
पुरस्ताच् छक्रा उत्तराद्
विश्वे देवाः समेत्य
ते (…) ॥

अरायान् ब्रूमो रक्षांसि
सर्पान् पुण्यजनान् उत ।
मृत्यून् एकशतं ब्रूमस्
ते नो मुञ्चन्त्व् अंहसः ॥

या देवीः पञ्च प्रदिशो
ये देवा द्वादशर्तवः ।
संवत्सरस्य ये दंष्ट्रास्
ते नः सन्तु सदा शिवाः ॥

भूतं ब्रूमो भूतपतिं
भूतानाम् उत यस् पतिः ।
भूतानि सर्वा ब्रूमस्
ते नो मुञ्चन्त्व् अंहसः ॥